Bigarren urtez jarraian, Valenciana su etxeak bereganatu du Donostiako Suen Nazioarteko Lehiaketako Urrezko Maskorra. Valentziako (Herrialde Katalanak) su etxeen ospea ederki justifikatzen da Donostiako Aste Nagusian, urte askotan garaile suertatu dira eta. Bigarren postua, Madrildik iritsitako Vulcano su etxeak lortu du, etxera Zilarrezko Maskorra eramanda. Hirugarren postuan, Brontzezko Maskorrarekin, Ingalaterrako Illusion Fireworks geratu da. Valenciana su etxeak bigarren Urrezko Maskorra du aurtengoa.
Urtero bezala, epaimahaiak lehiaketaren «maila bikaina» azpimarratu du. «Su etxeek eginiko ikuskizunak Valentziako gazteluen egituran oinarritutakoak izan dira, baina su etxe bakoitzak bere ezaugarriak, koloreak eta soinuak ezarri ditu», adierazi du antolakuntzak, prentsa ohar baten bidez.
Irabazleek 631,62 kilo bolbora erabili zituzten ostegun gauean, eta 1.900 tiro egin zituzten. Hamasei minutu eta 51 segundoko ikuskizuna izan zen Valencianakoena, eta, bukatutakoan, ikusleek txalo zaparrada handi batekin eskertu zieten jarduna. Antolakuntzaren iritziz, tiro denboretan «alde nabarmenak» ikusi ziren, eta kolore eta zarata «handiko» ikuskizuna izan zen. Valentziako traka tradizional bat izan zen irabazleek erabilitako azken kolpe handia.
Valenciana su etxeak bigarren Urrezko Maskorra du aurtengoa
Madrilgo Vulcano su etxeak bolbora kilo gehiago erabili zituen, 798,54 kilo zehazki, baina valentziarrek baino ikuskizun motzagoa egin zuten ostiralean: hamabost minutu eta 50 segundokoa. Ingelesek, aldiz, 568,33 kilo erabili zituzten, 1.160 tiroko ikuskizunean. Podiumeko jardunik motzena izan zen illusion Fireworks su etxearena, hamabost minutu eta sei segundokoa. Azken horien ikuskizuna, horrela definitu du antolakuntzak: «Mediterraneoko koloreak erabili zituzten, hala nola urdina, horia eta zilarreztatuak, kalibre handiko karkasak, eta Mediterraneoko soinua britainiar lasaitasunarekin konbinatu zuten».
Epaileek aurtengo irabazlea erabakitzeko «zailtasunak» izan dituztela adierazi dute: «Aurten hiru lehenengoekin ados ginen, baina hirurak ordenatzea gehiago kostatu zaigu».
Enbataren eraginak
Gazteen saria ingelesek jaso dute, eta herri epaimahaiak emandako saria hurrengo astean argituko dela esan du antolakuntzak. Horrez gain, Donostiako Su Artifizialen Nazioarteko Lehiaketak eskerrak eman dizkie Pirotecnia del Mediterraneo su etxeari, «erakutsitako profesionaltasunagatik» eta lehiaketan izandako «inplikazioarengatik». Abuztuaren 11n zen aurkeztekoa Pirotecnia del Mediterraneo etxearen ikuskizuna, baina gau hartako enbatan izandako haizetearen eraginez —81 kilometro orduko abiadura—, bertan behera utzi zuten programazioa.
