Iker Markinezek urraburua hartu du oinarri aste honetako errezeta prestatzeko:
Urraburu bat Azalore erdia Baratxuri freskoak, 12 Patatak, 3 Oliba olioa Ozpina Gatza
Arrandegian erditik moztuta erosiko dugu urraburua, bi zatitan goitik behera irekita.
Azaloreari loratxoak atera, eta lapiko batean ura jarri, gatz pittin batekin. Irakiten hastean, 10 minutuz egosi. Atera eta hoztu. Garrantzitsua da egosketa puntua justukoa izatea, aurrerago plantxan amaituko baitugu.
Baratxuri freskoak zuritu eta horiek ere pare bat minutuz egosi. Horretarako, azalorearen egosketako ur berbera erabiliko dugu. Baratxuri freskoari indarra pixka bat leunduko dio egosketa horrek, eta barrutik bigunago egongo da gero.
Patatak zuritu eta xerra borobiltxotan moztu. Zartagin batean olioa jarri eta bertan frijitu; xerren lodieraren araberakoa izango da denbora. Plater batera atera, sukaldeko papera jarrita. Horrela, olio soberakina kenduko dugu.
Plantxa sutan jarri, oliorik gabe, eta, ondo berotuta dagoenean, urraburu zatiak bertan jarri. Adi, jarri azala plantxaren kontra. Su ertainera jaitsi, eta, pazientziaz, egon ukitu gabe zortzi bat minutuz, gutxi gorabehera, eta oliorik bota gabe. Gatz pittin bat bakarrik gehitu. Ondoren, eman buelta espatula baten laguntzaz, eta azala erabat txigortuta duela ikusiko dugu. Orain, jarri aurretik prestatu ditugun osagaiak plantxan, urraburu zatien inguruan. Ozpin txorrotada bat eta oliba-olio txorrotada bat bota. Gorritu urraburu zatiak alde horretatik beste hiru bat minutuz. Plantxa itzali.
Gaur plantxan bertan zerbitzatuko dugu arrain goxo hau.
On egin!
