Iker Markinezek Donostiako Gastronomika jaialdian prestatu du aste honetako errezeta.
Onddoak, 250 g Zizahoriak, 200 g Tipulak, 2 Baratxuri aleak, 2 Pikillo piperrak, 2 dozena Oliba olio birjina (Jaen, Espainia) Gatz lodia
Aipatu nahiko nuke udazkeneko hiru osagai berezirekin egin dugula gaurko errezeta. Gainera, aste honetan Donostiako Gastronomika jaialdian parte hartu dugu, eta bertako errezeta azalduko dizuet. Andaluziako txokora gonbidatuak izan gara, Andaluziako jatorriko olioak eta gureak ditugun lehengai eta jakiak uztartuz errezeta askotarikoak egiteko. Horien artean, gaurkoa:
Beraz, errezeta honetarako, lehenik labea ongi berotzen jarri, 250 graduan. Labeko erretiluan pikillo piperrak jarri, eta labean sartu. Bertan erre, azala ongi belztu arte (garrantzitsua da), gutxi gorabehera hogei bat minutuz.
Bitartean, onddoak garbitu, ahalik eta ur gutxien erabiliz. Trapu busti baten laguntzarekin, hondar aleak ongi kendu. Ondoren, karratu txikietan moztuko dugu onddoa. Gorde.
Tipulak zuritu, eta horiek ere zati txikitan moztu. Zartagin batean oliba olio txorrota bat gehitu, eta bertan jarri tipula erregosten, su ertainean, hogei bat minutuz.
Beste zartagin batean, onddoak erregosten jarri, oliba olio txorrotada batekin, beste hogei minutuz, gutxi gorabera. Onddoa bigundu artean eduki.
Bi zartaginetako osagaiak zartagin bakar batean gehitu.
Zizahoriak eskuaz erdibitu. Guztiak prest ditugunean, onddoak eta tipula dauden zartaginera gehitu. Gatz pittin bat bota, eta bost bat minutuz mantendu, osagaiak ongi nahastu daitezen. Sua itzali, eta gerorako utzi.
Piperrak labetik atera, eta, epelduta daudenean, txortena eta azala kendu. Ondo zuritu. Ondoren, guztiak tira finetan moztu.
Plater txikietan, lehenik onddo eta zizahori koilarakada pare bat jarri erdian. Ondoren, piper tira batzuk. Gatz lodia gehitu. Errezetan erabilitako Jaengo jatorriko picual barietatea gehitu, oraingoan gordin, duen indar guztia ongi nabarmendu dadin. Bide batez esanda, arrakasta Itzela izan du gure pintxoak Gastronomika jaialdian.
