Iker Markinezek txitxirioak eta pikillo piperrak oinarri hartuta prestatu du aste honetako errezeta.
Dozena bat pikillo piper erreak Txitxirio egosiak, 300 g Kalabazina, 1 Azenarioa, 1 Tipula, 1 Lekak, 100 g Cherry tomatetxoak Oliba olioa Gatza Ozpina Maionesa
Urrian sartzear gaude, eta sasoi honetan izar nagusietakoa dugu Nafarroako pikillo piperra. Errezeta honetarako, jada erreak izango ditugu pikillo piper horiek, eta azala eta barruko hazitxoak ere kenduta edukiko ditugu. Ondoren, zinta luzeetan moztu, oliba olio txorrotada bat bota, eta gatz pitin bat. Tuper edo ontzitxo batean gorde gerorako.
Garbantzuak egosteko, bezperan uretan gau osoan eduki. Hurrengo egunean, ura kendu eta lapiko batean ur berria jarri, gatz pitin batekin. Garrantzitsua da ura irakiten hasi artean garbantzuak ez gehitzea. Beraz, urak irakitean txitxirioak gehitu, eta bertan egosi su ertainean, berrogei bat minutuz.
Bitartean, barazkiak garbitu eta guztiak tamaina bereko puska txikietan moztu (tomatetxoak ez). Guztiak batera lapikora gehitu, beste 30 bat minutuz. Ez jarri taparik.
Orain ura kenduko diogu lapikoari. Kontuz! Lapikoko salda ez bota; horrela, hurrengo egunerako zopa goxo bat egiteko erabil dezakegu. Beraz, ontzi batean gorde.
Cherry tomateak laurdenetan moztu, eta ontzi batean sartu, gatz, ozpin eta olio pixka bat botata. Tomateak nahastu eta txitxirioak gehitu, epel nahiz hotz. Guztia ongi nahastu.
Platera osatzeko garaian, txitxirioak eta tomatetxoak plateraren erdian kokatu. Pikillo piperrak plateraren bueltan jarri, eta, bukatzeko, maionesa pixka bat gehitu dezakegu.
