Azpizuna oinarri hartuta prestatu du Iker Markinezek aste honetako errezeta.
Txerri azpizuna, 2 pieza. Tipulin berriak, 4. Azenarioak, 2. Patata berriak, 8 txiki. Oliba olioa. Gatza. Ardo beltza, baso erdia. Piperbeltza. Mustarda (Dijon-Frantziakoa).
Lehenik, patatarekin hasiko gara. Patata berriaren sasoia denez, horiek erabiliko ditugu, azala kendu gabe, azala oso fina baitu orain patatak, eta horrelako platerak azala eta guzti egiteak beste zapore bat ematen baitio. Beraz, lapiko batean sartu patatak, urez estali, eta egosten jarri, su motelean, poliki, patatak lehertu ez daitezen. 15-20 minutuan eduki.
Labea berotzen jarri, 250 gradutan. Berotzen den bitartean, labeko erretiluan jarri azpizuna. Berotzen den bitartean, azpizunari gatza eta piperbeltza botako diogu. Azpizun piezak pixka bat igurtzi oliba olioarekin. Tipulinak zuritu eta erditik moztu. Labeko erretiluan jarri. Gauza berbera egin azenarioarekin, eta erretiluan jarri. Erretilua labean sartu eta 20 minutuz eduki.
Denbora pasatu ostean, erretilua atera, eta ardo beltza gehitu. Erretiluan saltsa egiten lagunduko digu horrek. Berriz labean sartu, eta labea itzali. Bertan utzi.
Egosi ditugun patatak lapikotik atera, eta erditik moztu. Zartagin bat berotzen jarri oliba olio tanta batekin, eta patatak plantxa moduan frijitu, su bizian, pare bat minutu alde bakoitzetik. Gatz pixka bat ere gehitu.
Platereratzeko, labetik atera azpizuna. Xafla lodi samarretan moztu, eta barazkiekin eta patatarekin batera plateretan banatu. Erretiluan dugun saltsa ere zabaldu gainetik. Azkenik, patata bakoitzaren gainean, koilara baten laguntzaz, Dijoneko mustarda pixka bat jarriko dugu.
