Trikitia maite duen orori larunbatean Agurainera (Araba) joateko deia egin dio Andoitz Antzitzar Lasak, Euskal Herriko Trikitixa elkarteko idazkariak. «Inork soinu txikia edo panderoa jotzen, entzuten, dantzatzen gozatu nahi badu, eta egun oso bateko asealdia hartu nahi badu, Agurainen aukera paregabea izango du». Aguraingo plaza, taberna eta txoko guztietan trikitiaren eta panderoaren doinua entzun ahal izango da egun osoan.
Euskal Herriko Trikiti Egunean tokia egongo da nola hasi berrientzat hala «ikaragarri dakitenentzat». Norberaren gaitasunen, indarraren eta gogoaren arabera joko dute trikitia edo panderoa. «Batzuek egun osoa jotzen pasako dute, eta beste batzuek deskantsuren bat egin beharko dute, eguna oso luzea izaten baita», ziurtatu du Antzizarrek.
Zazpiehun bat lagun dira biltzekoak, soinu joleak eta pandero joleak gehien-gehienak, eta hiru ibilbidetan banatuko dira herrian zehar. «Segur aski ibilbideak bata bestearekin gurutzatuko dira, beraz, etengabe egongo da Aguraingo kale guztietan, trikiti eta pandero soinurik». Geldialdiak egingo dituzte, eta horietan dantzatu eta abestu ere egingo dute.
Aurtengo berrikuntza zera da, hiru ibilbideak eskolaka banatu beharrean mailaren arabera banatuko dituztela. Modu horretara, Antzizarrek azaldu du hasiberriak eta tarteko maila dutenak haien antzera jotzen dutenekin arituko direla eta, bereziki, elkar ezagutzeko aukera izango dutela. Abestien zerrenda jada zehaztua izango dute, eta horiek joko dituzte kalejiran. Maila gehiago dutenek, berriz, askatasun osoa izango dute nahi dutena jotzeko, nahieran. Errepertorio zabala hitzeman dute.
Bi urtez behin
Aurreko urtean Iruñean egindako festaren antzekoa egin asmo dute. Hasiera batean, trikitien jaia urte bakoitietan ospatzekoak dira; alabaina, iaz egin zuten Iruñean, 2023an antolatzeko garaiz iritsi ez zirelako. Antzizarrek oroitu du garai batean ia urtero egiten zela, ondoren, eten bat izan zuela jaiak 2016tik 2022ra bitartean, pandemia tarteko, eta 2022an berriro ekin ziotela Euskal Herriko Trikiti Eguna ospatzeari, Pasaian (Gipuzkoa).
Herri bakoitzeko ezaugarriak tarteko, berezitasun horietara egokitzen jakin behar izaten dute. Pasaiatik Iruñera aldaketak izan ziren, eta Iruñetik Agurainera ere izango dira: «Pasaiak lau barruti zituen; Iruñeak, berriz, izugarrizko zabalera eta plaza ugari ditu; Agurain, ostera, txikiagoa da —5.000 biztanle inguru ditu—, eta aukerak ez dira berdinak». Hori dela eta, ez dituzte egingo eguerdian egin ohi zituzten kontzertuak eta, horren ordez, «erromeria handi bat» egingo dute eguna bukatzeko.
Bazkaria ere antolatu dute, ohi bezala. 670 lagun daude bazkaltzeko izena emanda, baina eskaera gehiago jaso dituzte. «Izen ematea eten behar izan dugu, herrian ez dagoelako jende gehiagorentzako tokirik». Antzizarren esanetan, bazkalondoa izaten da beraien «akelarre momentua»: «Baina egunak ere bukatu behar izaten du noizbait, eta, horretarako, kalejira erraldoi bat egingo dugu San Juan plazaraino, eta Bide Batez taldearen erromeria izango da azkenik».
Euskal Herriko Trikitixa Elkarteko idazkariak eskerrak eman nahi izan dizkio antolakuntza lanetan boluntario izan den taldeari: «Talde horri esker izaten dira [Euskal Herriko] Trikitixa Elkartearen egitasmo gehienak». Aguraingo Udala ere eskertu du, eguna antolatzen laguntzeagatik.
