Iker Markinezek oso ezaguna den errezeta bat prestatu du aste honetan: tiramisua.
Bizkotxorako Lau arrautza 125 g azukre 50 g kafe deskafeinatu hauts 125 g irin Kremarako Zortzi arrautza 200 g azukre 50 g irin Litro bat esne Mascarpone gazta, 750 g Kakao hautsa Almibarra egiteko Azukrea Ura Bi koilarakada kafe deskafeinatu hauts
Gaur, erabat ezaguna den postre italiar batekin gatozkizue. Lehenik, jarri labea berotzen bizkotxoa egiteko, 180 gradutan. Labeko erretiluan, ipini laberako paper berezia (tipula papera esaten zaiona), igurtzi gurinarekin, eta bota irin pixka bat, bizkotxoa itsats ez dadin. Hartu bi ontzi; jarri batean arrautza gorringoak, eta bestean zuringoak. Gorringoetan, gehitu lau koilarakada azukre, eta irabiatu bost minutuz etengabe, eskuz edo makinaz.
Gero, arrautza zuringoak harrotzen hasiko gara. Horretarako, irabiatu indartsu eta etengabe, eta, gogortzen hastean, gehitu bi koilarada azukre. Segi eragiten. Erabat gogortuta dagoenean, batu zuringo horiek gorringoekin, poliki-poliki. Koilara handi baten laguntzarekin, nahastu bi osagai horiek poliki-poliki. Gero, gehitu lau koilarakada irin eta kafe hautsa —50 g—, banan-banan. Ahalik eta polikien nahastu dena, harrotasuna erabat gal ez dezan. Zabaldu labeko erretiluan, eta sartu labean, 8-10 minutu. Atera labetik, hozten utzi, eta, erretilutik ateratakoan, kendu papera.
Krema prestatzeko, jarri esnea berotzen lapiko batean, eta, bitartean, ontzi batera bota arrautzen gorringoak. Gehitu azukrea, eta nahastu; irabiatu etengabe bost minutuz. Ondoren, gehitu irina, eta kontu handiz nahastu. Berotutako esnearen erdia ontzira bota, eta ondo nahastu. Lapikoan gelditu zaigun esnea irakin arte berotu, eta lapikora irauli ontzian duguna. Bost minutuz irakiten eduki, etengabe nahastuz, eta hozten utzi. Errezeta honetarako krema hoztuta egotea komeni zaigunez, nahiago baduzue krema aurreko egunean egin eta hozkailuan gordeta eduki dezakegu.
Mascarponea erretilu batean jarri, eta pixka bat irabiatu hagaxka baten laguntzarekin, pixka bat loditu arte. Gehitu pastel krema hotza, eta jarraitu irabiatzen eta nahasten. Gorde.
Ondoren, almibarra egingo dugu. Horretarako, jarri irakiten litro erdi bat ur. Gehitu lau bat koilarakada azukre. Irakiten hastean, itzali, eta gehitu koilarakada pare bat kafe deskafeinatu hauts.
Hiru xaflatan moztu prestatu dugun bizkotxoa. Eta zati guztiak ongi busti almibarrarekin. Hostopil moduan beteko dugu bizkotxoaren xafla bakoitza, mascarpone kremarekin, horretarako mahuka erabiliz: lehenik, hartu xafla bat, eta zabaldu mascarpone krema xaflaren gainean. Gero, ipini beste xafla gainean, eta berdin bete, mascarpone kremarekin. Eta, ondoren, azken xaflarekin beste hainbeste egin.
Azkenik, azken solairuko mascarpone kremaren gainean kakaoa gehitzeko garaia izango da. Bota eta ongi zabaldu.
