«Tabernara datorrenari gustatu behar zaio»

Ganba eta hirugiharra oinarrian duen Mika pintxoarekin Euskal Herriko pintxo onenaren marka etxeratu dute Hondarribiko (Gipuzkoa) Gran Sol jatetxekoek. Garrantzitsuena herriko jendearen onespena dela dio Mikel Muñoz sukaldariak, sariak eragindako emozioa gorde barik.

Iaz bigarren geratu zineten, aurten lehenengo. Non egon da sekretua?

Ez dago. Sukaldarien artean sekulako maila dago, eta urtero epaile ezberdinak daude, bakoitza bere gustuekin. Iaz ahatea laranjarekin jarri genuen, eta aurtengoak ez du zer ikusirik. Saria jasotzea itzela da, baina, azkenean, tabernara datorrenari gustatu behar zaio.

Zein dira benetan pintxo on baten osagaiak?

Onena, zaporea. Gero begitatik sartu behar da, eta teknikak ere inporta du, baina ez hainbeste. Pintxo ugari behar dira, eta gure sukaldea oso txikia da. Egun on batean 4.000 pintxo ematen ditugu, beraz, praktikoa izan behar duzu. Guretzat oso garrantzitsua da jendea etortzean beti eskatzen duena barran egotea.

Probatu dute Mika bezeroek?

Bai, azken bi asteetan eman dugu, eta haien arabera, dezente aldatu dugu. Hori da garrantzitsuena, asetzea jaten dutenarekin.

Finalisten artean lehia bai, baina lankidetza ere egon da?

Noski. Lagunak gara asko, eta irabazten duenak irabazten duela, pozten zara. Ikusi da sariak banatu direnean. Elkarrengandik ideiak ere hartzen ditugu; denak gaude ikasteko, ezin da gelditu.

Zer da zailena halako txapelketa batean?

Zer egin nahi duzun argi izatea. Eta gero horrekin jokatzen joatea, tenpurekin, plantxekin, saltsekin... Lotan zaudenean ere bueltak ematen diozu, eta hurrengo goizean gauean otutako hori probatzen duzu.

Nolakoa da Hondarribiko Gran Sol?

Pintxo taberna bat da, eta barra izugarria du, 500 pintxo inguru ditugu. Hirugarren belaunaldia gara. Nire anaiak duela hamabost bat urte hartu zuen. Aldatzeko apustua egin, eta ondo atera zen. Tradizioa berritzen saiatzen gara. Esaterako, badaukagu muskuilu sushi faltsu bat, azpitik gora jan behar dena, nire amak egiten zituen lehenago tigre frijituetan oinarrituta eta ekialdeko tokea emanda, edo arrautza bat puskatu behar dena jan aurretik, amonaren salda eta arrautzaren errezeta gogoan hartuta.

Pintxoa Mikaelari omenaldia da.

Bai. Anaia eta biok kanpoan ibiltzen gara asko, eta norbait egon behar da sukaldean, eta hori da bera. Urrea balio du.