Larunbatean ospatuko da San Joan eguna Euskal Herriko txoko askotan. Bezperan, sua piztuko dute hainbat herri eta hiritan.
Bilbon, Etxebarria parkean bilduko dira Bilboko konpartsak. 22:30ean piztuko dute sua, baina aurretik eta ondoren ere hainbat ekitaldi egingo dituzte. 19:30ean, Lurraren errituala egingo dute, eta, ondoren, jolas kooperatiboak, kontzertua eta txolokate jatea izango da. Sua piztu baino lehen, Lekeitioko Deabruek Korrefocs emanaldia eskainiko dute. Behin sua piztuta, Cloverwindekin kontzertua izango da. Festa gauerdirarte luzatuko da.
Donostian, Konstituzio plazan izango da ekitaldi nagusia. Ohitura denez, itxaropenaren zuhaitzaren inguruan dantzatuko dira. Arratsaldeko zazpietan, udal agintarien soka dantza egingo dute. Alkateak, zinegotziek, Goizaldi taldeko dantzariek eta udaleko txistulari taldeak parte hartuko dute. Ondoren, erromeria egingo dute, eta San Joan sua piztuko dute.
Iruñean, Donibane auzoan piztuko dute sua, 23:00etan. Gasteizen, berriz, bi su piztuko dituzte; lehena, 20:30ean Arriaga auzoan. Bigarrena, 22:00etan, Judimendiko parkean.
