Sagardoa, aparretan

Ama Oiharte. Halaxe du izena Zeraingo (Gipuzkoa) Oiharte sagardotegiko harribitxi berriak. Ez da ohiko sagardoa. Botilatik botatzerakoan berehala konturatuko da bezeroa, apar fin bat baitu, xanpaina balitz bezala. Hain zuzen, xanpaina egiteko erabiltzen den teknika berarekin ekoitzi dute. Baina, oinarrian, sagardoa erabili dute. Hala, alkohol gradu gutxiago ditu. Izena, berriz, sagardoaren hondarrari zor diote, ama esaten baitzaio, eta jendeak uste baino garrantzi handiagoa du. «Guztion ama, gainera, beti da berezia». Produkzio txikia egin dute, baina erantzun bikaina izaten ari da.

Sagardo aparduna sortzea, orain arteko eskaintza osatzeko beste modu bat izan dela nabarmendu du Haritz Eguren jabeak. «Honek, beharbada, oihartzun handiagoa izan du, Gabonen bueltan aurkeztu dugulako eta berritasuna izan delako. Baina aurretik abian jarri genituen turismoari lotutako eskaintza, Eusko Labelarena, ekologikoarena...». Beti egin dute berritasunaren alde. «Gure pentsamendua hori da, eta produktuen dibertsifikazioa dago horren oinarrian. Izan ere, sagardo naturala oso ondo dago; gurea da eta asko gustatzen zaigu. Baina gure pentsaera zabaldu, eta sagardoak eta sagarrek dituzten indarguneak eta aukerak baliatu behar ditugu».

Produktua lortzeko bide luzea egin dute. «Orain dela 3-4 urte hasi ginen aurreneko probak egiten. Hainbat dastatzetan probatzeko eman genuen, eta, izandako harrera ona ikusita, garatzen eta lantzen jarraitu genuen, orain arte. Produktu polita atera zaigula uste dut». Egiterakoan, sagardo naturalak baino «hamar aldiz lan gehiago» eskatzen duela azaldu du. «Sagardo natural batetik abiatu, eta xanpaina egiteko prozesua aplikatzen zaio. Modu naturalean, eta eskuz». Prozesu horri champenoise deitzen zaio: botilan bigarren hartzitze bat egiten zaio, legamia eta azukreak gehituta. Bederatzi bat hilabete uzten dute hartzitzen.

Egurenek hala azaldu ditu produktuaren ezaugarriak: «Burbuila edo txinparta fineko produktua da, freskoa, eta aldi berean lehorra. Kolore argia dauka, eta, amaieran, sagarraren zaporea uzten dizu. Kopa batean, bistarako ez diozu alderik sumatzen cava eta xanpainarekin». Dena den, bada alderik. «Alkohol graduazio baxuagoa du, eta freskotasun sentsazio handiagoa uzten dizu amaieran». Jaki gozoekin hartzeko oso aproposa dela uste du. «Egun hauten jaten diren turroi, polboroi, mazapan eta bestelako jakiekin hartzeko primerakoa da». Hartzen duenak garbi izan behar du, dena den, ez dela sagardo naturala. «Jendeak beste pentsaera batekin joan behar du. Ez du zerikusirik. Gerta liteke sagardoa gustuko izatea, eta hau ez, eta alderantziz». Berriki gertatu zaio hori bezero batekin. «Esan zidan ez zela oso xanpainzalea, baina hain freskoa eta atsegina izanda, gustuko zuela apardun sagardoa».

Ondo saltzen ari dira. «Denborak esango du zein leku duen merkatuan, eta balorazioa denborarekin egingo dugu. Baina erantzunarekin pozik gaude. Oso harrera ona izaten ari da. Produktuaren bila dator jendea, eta seinale ona da. Baina ikusi beharko da berritasunagatik den, edo gustuko duelako».