Puntu morea hiriaren erdian

Bulebarreko indarkeria sexistaren aurkako artatze gunea ez erabiltzeko nahiarekin bukatu dute elkarrizketa Donostiako Udalak, Piratek eta Bilgune Feministak. Hala ere, azken hilabeteetako albisteak entzun ondoren, zaila ikusten dute aukera hori.

«Bada garaia erasotzaileek eta haien babesleek erantzukizuna hartu dezaten, eta erasoak bukatu daitezen», adierazi du Elene Lopetegik, Donostiako Bilgune Feministako kideak.

Maiatzean, Piratek Donostiako Udalera jo zuten eskaera jakin batekin: Aste Nagusian, eraso sexisten artatzea integritate eta profesionaltasun osoz beteko zuen gune bat. Hori horrela, Donostiako Udalak, Piratek eta mugimendu feministak elkarlanean egin dute Bulebarreko prentsa kioskoan kokatuta dagoen puntu morea.

2019ko jaiak ekarri dituzte gogora Izar Hernandok eta Ane Telleriak, Piraten lantalde feministako kideek: «Eraso mordoa gertatu ziren azken Aste Nagusian. Hori horrela, konturatu ginen gure protokoloak tokatzen ez zitzaizkion gauzak hartzen zituela bere gain. Piraten gunetik kanpo erasoak izan ziren neska mordoa bildu zen gure puntura, eta horrek argi utzi zuen hirian hutsune handi bat zegoela. Horri tiraka egin dugu aurtengo aldaketa».

Aurtengoa, erantzun profesionala emango duen artatze gunea izango da, eta, jaiak irauten duen bitartean, egunez zein gauez egongo da. Artatzeaz gain, salaketa jartzeko aukera ere eskainiko du puntu horrek, eta informazio gunea ere izango da. «Jaiei begira, barne protokolo bat osatu dugu, eta Bulebarreko prentsa kioskoan egongo den puntu morea erreferentzia gunea izatea gustatuko litzaiguke», esan du Ane Oiarbidek, Donostiako Berdintasun zinegotziak.

Salaketei dagokionez, puntu horretan jarritakoak ez dira judizialak izango. Erasoa jasan duenak salaketa judiziala jarri nahiko balu, puntu horretako profesionalek Udaltzaingoarengana edo Ertzaintzarengana bideratuko lukete.

Protokoloa aktibatzea

Inork inolako erasorik jasanez gero, bi aukera daude: lehenengoa, Bulebarreko puntu morera bertaratzea da. Bigarrena, Piratek euren gunean jarriko duten puntu morera agertzea da, edo, bestela, inguruan, identifikatuta egongo diren brigada moreko kideengana jotzea. Lehenengoan, erasoaren arabera, neurri batzuk edo besteak hartuko dira, eta protokoloa martxan jarriko da. «Emakume batek erasorik jasango balu, protokoloa martxan jarriko litzateke. Hasteko, Emakumearen Etxera eramango da, eta bertan 24 orduz lanean ari den gizarte langile batek bere beharrei erantzuten lagunduko dio. Kasuaren arabera, erasoa jasan duenak erabakiko du zein neurri hartuko diren», gehitu du Oiarbidek.

Bigarrenean, behin erasoa identifikatuta, erasoa izan denaren beharrei erantzungo zaie, eta erasotzailea gunetik kanporatuko da. «Ez daukagu irizpide zehatzik. Protokoloan jasota daukagu puntu fisiko bat egongo dela eta lehenengo arretan lagunduko dugula. Ondoren, Bulebarreko erreferentzia puntura bideratuko genuke», gehitu du Hernandok.

Ikusgarritasuna hirian

Eraso sexisten aurkako kanpaina abiatu zuen Donostiako Udalak San Joan jaietan, eta kanpaina hori indartu egin dute Aste Nagusian. Horretarako, 10.000 eskuorri banatuko dituzte neska-mutilen artean, baita eskumuturrekoak eta txapak ere.

Bestalde, informazioa emateko eta materiala banatzeko, bi hezitzaile egongo dira gaztetxoenak biltzen diren guneetan. Bestalde, Piratek eta Bilgune Feministak manifestaziorako deia egin dute abuztuaren 20rako. «Gure egitarauan salaketari une berezitu bat eman nahi diogu. Erasoak publikoki salatu edo ez, ulertzen dugulako jaiak oraindik ere ez direla denontzat berdinak. Eta gainera, zoritxarrez, aurreikusten dugulako aurtengoan ere egongo direla erasoak», esan du Telleriak.

Hala ere, argi dute egindako proposamena aurrera eramatea ez dela nahikoa. «Pozik gaude bide baten hasiera delako, baina oso kontziente gara arretagune batekin ez dela nahikoa Donostia bezalako hiri batean», gehitu du Hernandok.