Peio Ospital Lapurdi Irratira itzuli ahalko da

Konpondu da afera. Baionako Elizbarrutiak uztailaren 16tik Peio Ospitali ezarritako debekuak bertan behera gelditu dira, eta hemendik aurrera Lapurdi Irratian sartu eta bere kolaborazioak egiten jarraitu ahalko du. «Irratiko beste edozeinek bezala, Ospitalek irratiko lokaletan bere eginkizunak bete ahalko ditu». Hala dio Ospitalek berak, Olivier Drape elizbarrutiko komunikazio arduradunak eta irratiko administrazio kontseiluko Alexandre Agerre eta Xalbat Berterretxe kideek sinatutako agiriak. Laurak ostiral arratsaldean bildu ziren, eta, afera sakon aztertu ostean, agiri bateratua plazaratzea erabaki zuten. Atzo eman zuten argitara Lapurdi Irratiaren webgunean —soilik frantsesez—.

Agiriaren arabera, elizbarrutiko komunikazio arduradunakOspitali ezarritako debekua, esatariak sortutako «mesfidantzarengatik» erabaki zuen elizbarrutiak. «Kexu gisa». Kexu eta mesfidantza horiek ostiraleko bileran sakon aztertu eta gero, Drapek agirian onartu du kexuak «oinarrigabeak» zirela. Gogorarazi behar da elizbarrutiko ordezkariak esan zuela «deabrua Ospital bezalako pertsonen bidez ari zela lanean». Deabruaren aipamenik ez da egiten atzo argitaratutako agirian.

Drapek bidalita, mezulari bat uztailaren 16an Ospitalen etxera joan zen. Lokaletara sartzeko debekuaren arrazoitzat Ospital Baionako apezpikuaren «arerio edo etsai deklaratua» zela azaldu zuen. Ospitali elizbarrutiak adierazi zion soilik irratiko sarrerara ager zitekeela, «kronikak grabatzeko nahikoa zelakoan». Baina komunikazio zerbitzurako erabiltzen den bigarren solairura eta lehen solairuko irratiaren espazio komunera sartzeko debekatu zitzaion Ezpeletako kantari eta esatariari. «Debeku horrek irratitik kaleratua sentiarazi zion Ospitali», dio agiriak.

Ospitalek, era berean, aitortu du, —lokaletara sartzeko debekuaz aparte— Drapek ez zituela auzitan jarri esatariaren irratiko eginkizunak, «ez bere kroniketan ez administrazio kontseiluan».

Bi aldeek, azkenik, dute komunikazio edo harreman «zuzenago» baten falta sumatu dute. «Harreman horrek saihestu zitzakeen inguruko hedabideetan zabaldu diren zorigaiztoko informazioak. Zenbaitetan egiaztatu ez diren informazioak».

Ospitalen kritikak Elizari

Hamabi urte dira Ospitalek Lapurdi irrati kristauan kolaboratzen duela. Joan den astean, BERRIAri esan zion gauzak «zeharo» aldatu direla Marc Aillet apezpikua sartu zenetik. Eliza katolikoari kritika zorrotza egin zion, bide batez: «Hegoaldean zein Iparraldean bada estrategia bat. Elizak herri honekin historikoki izan duen lotura estua apurtzeko asmoa dago hor».