Oporrak antolatzeko azoka aproposa

Oraindik oporrak non igaro erabakitzeke dutenek Expovacaciones azoka lagungarri izango dute gaurtik igandera bitarte; Amerika, Europa eta Afrikako hainbat herrialderen eskaintzak aurkitu ahal izango dituzte Barakaldon egingo den azokan, BECen (Bizkaia). Laurehun erakusmahai inguru egongo dira, eta ez da ezer faltako: zozketak, beherapenak, erakustaldiak, dastaketak... Turismoari lotutako plaza izango da BEC datozen lau egunetan.

34. ekitaldia du aurtengoa azokak, eta, beste behin, eskaintzarik onenak egongo dira ikusgai. Hasi Euskal Herriko txokoetatik , eta munduko hainbat herrialderen informazioa izango da. Antolatzaileen arabera, ekonomikoki ere eskaintza interesgarriak aurkitu ahal izango dituzte bisitariek. Bereziki horretan saiatuko dira aurten, bidaia onak bezain merkeak eskaintzen. Aurreko urteetan 240.000 bisitari izan ohi dira azokan, eta aurten ere beste horrenbeste espero dituzte antolatzaileek.

EXPOVACACIONES AZOKA

Non. BECen, Barakaldon.

Noiz. Gaurtik igandera. 11:00etatik 20:30era.

Sarrera. Hiru euro gaur eta bihar. Bost euro larunbatean eta igandean.