Handia egin du Atxondoko Etxebarri jatetxeak (Bizkaia). Bart banatu dituzte Munduko 50 Jatetxerik Onenen Sariak, Las Vegasen (AEB), eta bigarren posturaino jauzi egin du Bittor Arginzoniz sukaldariak zuzentzen duen jatetxeak. Zerrenda horretan bada Euskal Herriko beste jatetxe bat: Elkano, Getariakoa (Gipuzkoa). Irabazle, berriz, Disfrutar jatetxea izan da, Bartzelonakoa. Erresuma Batuko Restaurant aldizkariak urtero egiten du munduko 50 jatetxe onenen zerrenda, askoren ustez gastronomiaren Oscar sarien parekoa. Sariketa horrek 22. aldia du aurtengoa —2020an ez zuten egin, COVIDaren eraginez—.
Etxebarri «helmuga magikoa duen jatetxea» dela azpimarratu dute sariketan, eta «mendiz eta berdetasun oparoz inguratutako Euskal Herri baketsu batean» dagoela. Arginzonizen sukaldaritzaren «zapore naturalak» azpimarratu dituzte, eta lehentasuna «osagaiei» ematen dietela goratu.
Atzera eginda, azken urteotan urtero izan dira euskal jatetxeak zerrenda horretan —Etxebarri jatetxea 2009tik behin bakarrik geratu da zerrendatik kanpo—. Urrutirago joan gabe, iaz laugarren postua lortu zuen Etxebarri jatetxeak, 22. postuan zerrendatu zuten Elkano, eta 31. postuan Mugaritz, Errenteriakoa (Gipuzkoa). 2022an, 6. postuan sailkatu zen Etxebarri, 16. postuan Elkano, eta 21. postuan Mugaritz. 2021ean, podiumeko hirugarren koskara igo zen Etxebarri, 14. postua lortu zuen Mugaritzek, 16.a Elkanok, eta 49.a Azurmendik (Larrabetzu, Bizkaia). Besteak beste, Nerua (Bilbo), 2019an —32. postuan—, eta Arzak (Donostia) 2018an —31.— eta 2017an ere —30.— sartu zituzten zerrenda horretan.
