«Militanteak ez, jende xumea aztertu nahi dut»

Ibai Agirrebarrena (Baiona, 1989) komunikazio masterra ikasten ari da Bilbon. Arnasa Luzea plataformako lehen proposamena aurkeztu du: Jauzia, 1980-90eko hamarkadetan ETAn militatu edo hura sostengatu zuten hainbat herritarren lekukotasunak bilduko ditu, garai hura ulertzen saiatzeko eta «jende normalak» batere arruntak ez diren erabakiak zergatik hartzen dituen azaltzeko.

Erreportaje sakonerako ideia hau bazenuen aurretik, edo Arnasa Luzea plataformaren berri izan ondoren pentsatu zenuen?

Aspaldi nuen gogoa gaia lantzeko, baina, Arnasa Luzea egitasmoaren berri izan nuenean, ikusi nuen egin zitekeela. Orduan erabaki nuen egitasmoa aurkeztea.

Zergatik 1980-90eko hamarkadak?

Gatazka orduantxe zegoelako unerik odoltsuenean, eta orduan zegoelako inplikaturik jende gehien. Errefuxiatu gehienak ere garai horretan heldu ziren Ipar Euskal Herrira. Tarte bat pasatu denez, orain jendea has daiteke kontatzen, errazago eta beldur gutxiagorekin, orduan gertaturikoa. Ipar euskal herritarrak daude tartean, baina baita Parisen edo Frantziako beste leku batzuetan jaioak. Ez dut arreta jarri nahi izan militantziaren mundu zurrun horretatik heldutako jendean, baizik eta jende xumean edo frantses jendean, ikusteko nola aurkitu dituzten euren buruak gatazkaren barnean; parte hartzeraino, gainera.

New York Times kazetak 2012. urtean eginiko Snow Fall erreportaje multimedia hartu duzu eredu modura. Zergatik?

Eredu berri bat delako erreportajeak argitaratzeko. Nik, testu, irudi eta bideoaren arteko osagarritasuna aurkitu nahi dut. Interneteko kontsumorako egokia da, eta baita jende gaztearen arreta zeureganatzeko. Web-doc bat egitea da azken helburua, hau da, Interneteko gune bat, erreportajea azaleratzeko.

Sare sozialak erabiltzeko asmoa agertu duzu, besteak beste, jendeari parte hartzeko aukera emateko. Parte hartu, nola?

Twitter asko erabiltzeko asmoa dut, eta bloga eratzeko Zuzeu.eus-en. Hor jendeak aukera izango du eztabaidatzeko. Horrez gain, dokumental gunea amaitzen dudanean, jendeari proposatuko diot pertsona batzuk elkarrizketatzea, gero nire gunean argitaratzeko. Alderantziz ere bai: jendeak proposatutako pertsonak elkarrizketatzea nik.

Zenbat diru eskatuko diozu jendeari, eta nola salduko diezu zeure egitasmoa?

Dena egiteko 4.800 euro beharko ditugula kalkulatu dugu. Lortzen dugun diruaren arabera, lau, sei edo ahal ditugun elkarrizketak egingo ditugu. Erreportajea egin egingo dugu, kopuru hori lortzen ez badugu ere, baina, agian, soilik artikulu idatziak, bideo edo dokumental gunerik gabe. Espero dut jendeari interesgarria iruditzea eta laguntzea. Dirua ematen dutenek izango dituzte sari batzuk: egitasmoaren poster bat edo argazkiak...

Zergatik egin beharko genituzke halakoak Euskal Herrian?

Adibide gehienak ingelesezko mundutik heldu zaizkigu; Espainiatik edo Frantziatik ere oso gutxi. Kazetaritza tradizionala ez da nahikoa, denbora gehiago pasatzen dugulako pantailaren aurrean paperarekin baino. Euskal Herrian halako formatuak beharko genituzke, hasteko, euskara garatzeko Interneteko munduan.