Legutioko Ikurrina jokoan

Legutioko Ikurrinaren lehen batel txapelketa jokatuko dute bihar Legutioko urtegian. Parte hartzaileek eguerdiko hamabietan ekingo diote norgehiagokari. Lehengo txapelketa honetan, kadeteak eta gazteak arituko dira lehian. Josetxo Fernandez Euskal Arraun Federakundeko lehendakariak dio apustu «sendoa» egin dutela aurtengo estropadak gizartera zabaltzeko eta bihar jendea erakartzeko; izan ere, helburuetako bat da datozen urteetan aurten hasitakoa ospatzen jarraitzea.

Izan ere, Fernandezek azaldu du «EAEko olinpiar arrauneko pista bakarrak» direla Legutioko urtegikoak. Eta olinpiar arrauna inguruotan bultzatu eta sustatu nahian, aurten Legutioko Ikurrinaren lehen batel txapelketa egitea erabaki dute. Federazioko lehendakariak espero du «urte luzez» irautea bihar hasiko denak. Badaki berria den zerbaiti ekitea «zaila» dela, baina «hasi egin behar da». Arabako Arraun Federazioak antolatu du txapelketa, Legutioko Udalak babestuta.

Batel gazteak

Zortzi taldek parte hartuko dute kadeteen mailan, eta lauk, berriz, gazteen mailan. Guztira, zortzi estropada egingo dira bihar. Lehenik, kadete mailako bi kanporaketa egingo dira, guztien artetik lau batelik onenak hautatu ahal izateko. Hori lortuta, finala jokatu beharko dute sailkatutako kadeteek alde batetik, eta gazteek bestetik. Azkenik, finalera sailkatu ez diren kadeteek kontsolamendu estropada jokatuko dute. Irabazleek ikurrina eramango dute etxera, eta bigarren eta hirugarren postua eskuratutako batelei, berriz, garaikurra emango diete sari gisa.

Honako hauek izango dira parte hartzaileak: Pasai Donibane Koxtape (Pasaia), Tolosa, Hibaika (Errenteria), Arkote (Plentzia), Zarauzko, Isuntza, Itsasoko Ama (Santurtzi) eta Mundaka.