Iker Markinezek legatza hartu du oinarri aste honetako errezeta prestatzeko.
Legatza, 4 pusketa Udaberriko zizak, 100 gramo Zortzi zainzuri fresko Baratxuria, 2-3 ale Kaiena piper bat Gatza Oliba olioa Irina
Zainzuriak prestatzen hasiko gara lehenik. Horretarako, zainzuriak ipurdi aldean zentimetro bat inguru moztu, eta, ondoren, goitik behera zurituko ditugu. Kontuan hartu puntaren aldea ez dela behin ere zuritu behar.
Lapiko handi bat urez bete, gatza bota, eta azukre pitin bat ere bai. Ura irakiten hastean, zainzuriak gehitu eta ordu laurden batez irakin; zainzurien lodieraren arabera, beharbada, denbora gehixeago eduki beharko ditugu irakiten. Ondoren, sua itzali eta zainzuriak bertan utzi.
Patata berri batzuk egosi. Pataten tamainaren araberakoa izango da denbora, ordu erdi bat, gutxi gorabehera. Ondoren, hozten utzi eta zuritu.
Legatza prestatzeko, lapiko zabal bat hartu, oliba olio txorrotada bat bota, eta bi baratxuri ale gehitu, ondo xehatuta. Baita kaiena piper pusketa bat ere. Su ertainean berotu, eta, baratxuria dantzan hastean, oraindik gorritu gabe dagoenean, bota koilarakada bat irin. Guztia ongi nahastu, eta zainzuriak egosteko uraren pare bat kazokada gehitu. Legatza lapikoan sartu, gatz pitin bat bota, eta su ertainean eduki 10 bat minutuz; suabe-suabe irakin. Zurituak ditugun patatak xaflatan moztu eta lapikoan sartu.
Bitartean, sasoi honetako produktu nagusietako bat prestatzen hasiko gara: udaberriko zizak. Zortea baduzue, dagoeneko eskuragarri izango dituzue gure mendi eta azoketan. Zizak pixka bat garbitu eta xafla finetan moztu. Zartagin batean gatz eta oliba olio pitin batekin salteatu edo erregosi, su bizian, minutu batez. Ez da komeni gehiegi erregostea. Bota zizak legatzaren lapikora.
Egositako zainzuriak ere uretatik atera, erditik moztu eta legatzaren lapikora bota. Guztia beste minutu batez irakin, eta prest dugu zerbitzatzeko.
Platerean aurkezteko, patata xaflak jarri lehenik, legatza gainean ondoren, zainzuriak plateraren alboan kokatu, eta, azkenik, saltsarekin batera, zabaldu zizak platerean, osagai guztiak ondo bustiaz platerean zabaldu.
