The Skatalites talde jamaikarrarekin hasiko da jaialdia, gaur, 22:30ean, Elizpean. Bihar, ostera, Shaun Booker estatubatuarrak gospel eta blues kontzertua eskainiko du, leku eta ordu berean.
Bigarren asteburuan, Elorrioko plaza izango da protagonista. Uztailaren 14an, Suripanta konpainiaren Los Pelopidas antzerkia ikusi ahal izango da. Hilaren 15ean, Mahotella Quees Hegoafrikako emakumeez osatutako taldea ariko da. Bi ikuskizunak Elizpean izango dira, 22:30ean. Arratsaldez, berriz, Euskal Herriko hainbat konpainiak dantza garaikidearen erakustaldia egingo dute, 19:00etan, plazan.
Hirugarren asteburuan, 21ean, Jorge Pardo madrildarrak jazza eta flamenkoa uztartuko ditu bere ikuskizunean, 22:30ean, Lariz jauregian. Hurrengo egunean, berriz, ordu eta leku berean izan arren, Guinearaino salto egin ahal izango dute ikusleek, Ba Cissokoren emanaldiaren bidez. Asteburu horretan ere, arratsaldez, Euskal Herriko hainbat antzerki taldek mikro antzerki ikuskizunak emango dituzte, Jara jauregian, 19:00etan hasita.
Musikaireren azken asteburuan euskal musikaren txanda izango da. Ruper Ordorikak kontzertua emango du, 28an, 22:30ean, Tola jauregian. Hurrengo egunean, Antonio Lizana Cadizeko musikariak flamenkoa eta jazza uztartuko ditu saxofoiarekin. Azkenik, igandean, folk eta jazza nahasten dituen Khami taldearekin itxiko da jaialdia, 19:00etan, Tola jauregian.
Musikaire jaialdia
Gaurtik uztailaren 30era arte, Elorrion (Bizkaia).