Kale ikuskizun 'basatia'

Markeliñeren animaliek Elorrioko (Bizkaia) bazter guztiak beteko dituzte gaur, 18:00etan. Zoozoom kale ikuskizuna emango du taldeak udaletxeko plazan, eta parke zoologiko bitxia bilakatu nahi izango du. Izan ere, haurrak, zeinak bi gizon eta bi emakume antzezleekin batera ikuskizuneko protagonista izango diren, jirafa, flamenko, elefante, arrain, karramarro, dinosauro, intsektu, gorila, barraskilo eta beste bilakatuko dira.

Markeliñek kaleko ikuskizunaz gozatzeko beste era bat proposatzen du: dibertigarria eta parte hartzailea. Horrela, bertaratzen diren haurrek antzezlanean parte hartu ahal izango dute, festa giroan.

Hainbat istorio batzen dituzte emanaldian, eta herri ipuinetatik eta elezaharretatik ateratako pertsonaiak nahasten dituzte: baztertua sentitzen den ahatetxo itsusia egongo da; txanogorritxo, zeinak otsoa jateko aukera izango duen; ehiztari salbatzailea; giza haragia jaten duten dinosauroak...

Ibilbide basatia egingo dute gaur Elorriora joaten direnek. 18:00etan, itsas maskor batensoinuak eraldaketaren magia piztuko du: hodeietatik, zizareak agertuko dira; plantxetatik, karramarroak, eta oihaletatik, elefanteak.

MARKELIÑE, 'ZOOZOOM'

Noiz. Gaur, 18:00etan.

Non. Elorrioko udaletxeko plazan (Bizkaia).