Itsasoa gara lelopean, lehen aldia ospatuko du apirilaren 1etik 3ra Ababor azoka nautikoak Irungo Ficoban (Gipuzkoa). «Eskaintza aberatsa eta erakargarria» prestatu dute Hondarribiko eta Irungo Udalak eta Hondarribiko Klub Nautikoak. Aisialdiaz gozatzeko itsas jarduerak aukeratzen dituztenentzat pentsatu dute proiektua, gehienbat, «geroz eta gehiago baitira itsas jarduerez gozatu nahi dutenak». 43 erakusketariren aterpe izango da asteburuan, beraz, Ficoba: «Bisitariei ingurune eroso eta abegitsu batean itsasoaz eta uretako jarduerez gozatzeko aukera eman nahi diegu».
Bultzatzaileen ustetan, horiek guztiek «arrazoi onak» izango dituzte azokara joateko: «Aukera ona izango dute salgai edo alokatzeko dauden ontziak bertatik bertara ikusteko, laketontzien titulazioren bat lortzeko edota itsas kirolen gaineko informazioa jasotzeko».
Maialen Gaztañaga du lemazain proiektuak, hura baita Ababorreko zuzendaria, baina Hondarribiko zein Irungo Udala eta Hondarribiko Klub Nautikoa izan ditu lagun azoka aurrera eraman ahal izateko. Gaztañagak azaldu du turismo nautikoak presentzia handia izango duela azokan, baina, horrez gain, ontziak ere izango dira: «Bisitariek 30 ontzi baino gehiago aurkituko dituzte Ficobako pabiloietan ikusgai, eta baita salmentan ere». Gehitu du 11:00tik 20:00tara bitarte egongo dela zabalik azoka: «Etorri nahi duen ororentzat egongo da zabalik azoka, eta dohainik izango dira bai sarrera eta baita aparkalekua ere».
Aisialdiaz harago
Kontzertuz eta hitzaldiz beteriko egitarau zabala antolatu du Ababorrek. Gainera, haurrek ere parte hartzeko aukera izango dute. Izan ere, haientzako ekintzak antolatu ditu egitasmoak, «haurrak itsasoarekiko eta uretako jarduerekiko pasioa sentitzen has daitezen».
Hala hitzaldiak nola mahai inguruak ere izango dira asteburuko egitaraua osatzeko. Hain zuzen, jasangarritasunaz, itsasoa zaintzeko beharraz eta nautikaren erronkez arituko dira, besteak beste, antolatu dituzten mahai inguruetan.
Gainera, 500 urte dira aurten Elkanok munduari lehen bira eman zionetik, eta, sustatzaileek aurreratu dutenez, «ez da faltako Elkano Fundazioaren hitzaldirik Ababorren». Eta, horren harira, Mila galdera haizetan dokumentala ere egongo da ikusgai, «euskal itsas ondareari eta itsas nortasunari balioa emateko, euskaldunek gaur egun itsasoarekin duten harremanari buruzko gogoeta sustatzeko».
