Iker Markinez sukaldariak verdina babarruna oinarritzat hartuta prestatu du aste honetako errezeta.
Verdina babarruna, 500 g. Almejak, 500 g. Ganba, 300 g. Tipula bat. Kuia txiki bat. Azenarioa bat. Baratzuri aleak, 2. Gatza. Oliba olioa.
Gaurko errezetan erabiliko dugun osagai nagusia verdina babarruna da. Lekale bat da verdina. Gehien erabiltzen den eskualdea Asturias da. Normalean, oso ondo gelditzen da itsaso jatorriko lehengaiekin. Verdinak propietate berezia du sukalderako. Oso ale fina da, eta gurintsua.
Lehenik, aurreko egunetan uretan beratzen jarriko ditugu verdina babarrunak. Gau batekin nahikoa izango da.
Ondoren, lapiko batean jarri; beratzen erabili dugun ura ere bai. Gehitu ura, gutxienez hiru hatz gora soberakin lapikoan. Irakiten jarri, beste inolako osagairik gehitu gabe. Irakiten hastean, lekale guztiak bezala, apar bat askatzen hasiko da. Garrantzitsua da apar gehiena kentzea. Ondoren, oliba olio txorrotada bat gehitu, eta kalabazina, kuia eta tipula puska txikietan moztuta gehitu. Guztia egosi ordu eta erdiz, su motelean. Gatza bota jarraian, behin egosi ondoren, bestela lekaleak haustea erraztuko baitu.
Ganbak zuritu, eta buruekin eta azalekin salda azkar bat egin. 5 minutuz irakinda nahikoa da. Salda hori iragazi eta gorde.
Zartagin batean bi baratxuri ale xehatuta jarri, oliba olio txorrotada batekin. Dantzan hastean, almejak eta ganbak gehitu. Eta, jarraian, ganben salda. Sua pixka bat moteldu, eta segituan, almejak irekitzean, zartagineko osagai guztiak verdinak ditugun lapikora bota.
Lapikoa beste 5 bat minutuz su motelean berotu, eta jateko prest izango dugu.
