Gibelurdinak oinarri hartuta prestatu du Iker Markinezek aste honetako errezeta.
Gibelurdinak, dozena bat. Legatza, 12 puska/xerra. Lekak, 300 g. Cherry tomatea, 200 g. Baratxuria, 4 ale. Kaiena piperra, 1. Oliba olioa. Gatza.
Lehenik, gibelurdinak garbituko ditugu. Horretarako, txortena moztu, eta, trapu busti baten laguntzarekin, lurra ondo kendu. Ondoren, txorten guztiak xaflatan moztuko ditugu. Gibelurdin txapelak ere banan-banan pasatu trapu edo papertxo busti batekin, lurra eta gainerakoak ongi kentzeko. Plater batean gorde gerorako.
Zartagin batean xaflatan moztu ditugun gibelurdinak erregosi, oliba olio tanta batekin, hiruzpalau minutuz, su bizian. Gatz pixka bat ere gehitu. Ondoren, xaflatan moztutako bi baratxuri ale gehitu, eta beste pare bat minutuz gorde.
Lekak tira finetan moztu, juliana moduan. Lapiko batean ura ipini, eta irakiten hastean hara gehitu. Bost minutuz mantendu, eta, ondoren, ur hotzetatik pasatu eta gorde. Garrantzitsua da egosteko denbora horiek errespetatzea.
Gibelurdin txapelak, osorik ditugunak, zartagin edo plantxa batean pasatu, oliba olio eta gatz pixka bat gehituta. Horretarako, nahikoa da zartagina edo plantxa ondo berotzea eta bi minutuz plantxatik pasatzea. Ondoren, labeko erretilu batean kokatu, bata bestearen ondoan.
Azkenik, legatz pusketei gatz pittin bat gehitu, eta puska bakoitza gibelurdin txapelen gainean jarri, labeko erretiluan. Ur irakinetan pasatutako lekak ere labeko erretiluan zabaldu. Eta, azkenik, cherry tomateak erditik moztu, eta horiek ere labeko erretiluan zabaldu.
Labea berotzen jarri, 250 gradutan. Berotuta dagoenean, erretilua labean sartu eta bost bat minutuz eduki. Arrain zatiak lodiak badira, beharbada denbora pixka bat gehiago beharko dugu. Ateratzean, gelditzen zaizkigun bi baratxuriak eta kaiena pipertxoa oliotan erre eta erretiluaren gainean zabaldu.
Azkenik, platerean jarri eta goxo-goxo dastatu.
