Ibone Bengoetxea EITBko zuzendaritzan arituko da

Unai Rementeria Bizkaiko ahaldun nagusiak kargutik kendu du aste honetan Ibone Bengoetxea. Legealdia hasi zenetik Herri Administraziorako eta Erakunde Harremanetarako Saileko foru diputatua izan da Bengoetxea; eta kargugabetu eta ordu gutxitara, EITBko zuzendari nagusi Andoni Aldekoak irrati-telebista publikoan aritzeko kontratatu du. EITBko zuzendaritzako kargu bat izango du Bengoetxeak. Iñaki Azkuna Bilboko alkate zen garaian, elkarrekin aritu ziren lanean Aldekoa eta Bengoetxea jeltzaleak. Bilboko Udaleko zinegotzia eta Eudel udalen elkarteko presidentea izan da Bengoetxea.

ELA sindikatuak adierazi du kontratazioaren inguruko xehetasunak eskatuko dizkiola Aldekoari, hilaren 30ean, EITBko administrazio kontseiluan. «EITB bere sorreran markatutako ildotik gero eta gehiago urruntzen ari da», kritikatu du ELAk.