Fideo zopa bat izan daiteke lehendabiziko begi kolpean. Koilara ahora eraman ondotik, ordea, mundu berri bat irekitzen da: ramenarena.
Fideoak japoniarrak badira ere, ramena jatorriz Txinako sukaldaritzatik eratorritako platera da. Zopa, oro har, txerri edo oilasko hezurrekin egiten da, barazki batzuk gehituta. Euskal Herrian geroz eta ohikoagoak dira jatetxe japoniarrak; are, geroz eta gehiago dira etxean Japoniako sukaldaritzan aritzen saiatzen direnak. Donostiako Muka jatetxeak ere egin du horren aldeko apustua: Tomita Osamu eta Shota Iida maisu japoniarrak ekarri ditu bere sukaldera, gaur eta bihar 80 lagunentzako afaria presta dezaten. «Jatetxea bi zatitan banatuta dago: goikoa eta behekoa», azaldu du Juan Vargas Muka jatetxeko sukaldariak. «Beheko zatian bertako gastronomia lantzen dugu; goikoan, berriz, berrikuntzen alde egiten dugu, eta horregatik etorri dira ramena prestatzera».
Osamu eta Iida sukaldaritza japoniarrarekin hasi ziren, eta gero jarri zuten arreta ramenean. Osamu «harrituta» geratu zen platera lehendabizikoz dastatu zuenean, eta nola kozinatu ikasten hasi zen. «Maisu japoniar batek ramen mota jakin baten errezeta erakutsi zidan; nik, nola egin ikasi, eta nire gustura prestatzen ikasi dut».
«Maisu japoniar batek ramen mota jakin baten errezeta erakutsi zidan; nik, nola egin ikasi, eta nire gustura prestatzen ikasi dut».
TOMITA OSAMUSukaldari japoniarra
Plateraren elikagai nagusia fideoa da, ez dute zalantzarik egin horretan: «Eskuz egiten ditugu, baina irinaren eta uraren kalitatea ona izatea ezinbertzekoa da», azaldu du Shota Iidak. Horretaz gain, txerriaren edo oilaskoaren kalitateak ere «ona» izan behar du. Platera bere osotasunean ona izan dadin, ordea, Iidak argi du zer behar den: «Ramen on batek elikagaiekiko eskertza eta errespetua erakutsi behar ditu».
Euskal Herriaren eta Japoniaren artean «distantzia fisiko handia» dagoen arren, Iidak antzekotasun nabarmenak ikusten ditu bien artean: «Kultura gastronomiko berezia da hemengoa ere». Osamuri, zehatzago, pintxoen mundua gustatu zaio gehien. «Akaso ramena pintxo bihur dezakegu», jarraitu du. Fideo zoparena, plater bakarra den arren, elikagai anitzek osatzen dute. «Uste dut osotasun horrek egiten duela berezi», adierazi du Iidak. «Ez dakit ongi zerk erakartzen duen jendea, baina uste dut ez daudela plater anitz hainbertze produktu biltzen dituztenak».
«Ez dakit ongi zerk erakartzen duen jendea, baina uste dut ez daudela plater anitz hainbertze produktu biltzen dituztenak».
SHOTA IIDASukaldari japoniarra
Asteazkenean iritsi ziren maisuak Donostiara eta asteartean itzuliko dira etxera, larunbateko eta igandeko afariak prestatu ondotik. «Gauez ezingo dugu lorik egin, fideo anitz baitaude egiteko», bota dio Iidak Osamuri. Alabaina, Euskal Herrikoa ez da eginen duten lehendabiziko erronka, bertze herrialdeetako produktuekin ere aritu baitira lanean. «Horrelako egitasmoek balio dute ikusteko ez dela Japoniako produkturik behar ramena egiteko», azaldu du Iidak. Bidaiatzen duten leku bakoitzeko plater bat osatzeko ohitura hartu dute, tokian tokiko elikagaiak erabilita. Horretara datoz Euskal Herrira ere.
Osamu, Iida ez bezala, lehendik izana zen Euskal Herrian: «Donostiako zinemaldira etorri nintzen dokumental bat aurkeztera, eta kozinatu ere egin behar izan nuen». Orduantxe pentsatu zuen lehen aldiz ramenarekin ere zerbait egin zezakeela bertan.
Asteburura begira, gogotsu daude biak, eta garbi dute zer lortu nahi duten: ramena ezagutaraztea eta jendeak disfrutatzea. «Oraintxe bertan Euskal Herriko oilasko eta txerriekin ari gara lanean, zopa egiten, batez ere», kontatu du Iidak. Ziur da sukaldarien gogoa platereraino iritsiko dela eta jaleek sumatu eginen dutela.
Larunbatean eta igandean jatera etorriko diren gehienak euskal herritarrak dira, «kultura japoniarra gustuko dutenak», zehaztu du Juan Vargasek. Ez da lekurik gelditzen, baina itxaron zerrenda bat egin dute kanpoan geratu direnekin. «Badaezpada ere». Hiru zatitan banatuko dute afaria: lehena Muka jatetxekoek eginen dute; ramena, maisu japoniarrek; eta, postrea, etxekoek.
