Arratsaldean, Bidearen alabak izeneko hitzaldia egingo dute, gazteleraz, 17:30ean. Z aretoan hitz egingo dute Anna Fux artista bisual eta idazleak eta Fatima Aspiritou gizarte integratzaile, aktibista antirrazista eta feminista dekolonialak. Leku berean, performance bat egingo du Elena Aitzkoa artistak: Haitz biberoia, 19:00etan.
Gero, afari kolektiboa egingo dute, eta, 21:00etan, Tripak kolektiboak antolatu duen ibilaldia. Astea festarekin itxiko du Feministaldiak. 22:00etan hasiko da Cabayo performancea. Eddi Circa, DJ Bihotza eta DJ kika1000 arituko dira. Maitasun aitorlekua ere izango da Continta Me Tienez argitaletxearekin egin duten lankidetzan. Gauean, Fabiola Espiga, Alazne Zubizarreta eta Ahuntzaren Eztula tatuatzen arituko dira.
Adierazpen feminista
2006. urtean hasi eta urtero egin dute Feministaldia jaialdia, abenduan. Alorraren esanahiak aldatzeko, edozein forma eta helburu zalantzan jartzeko, eta istorio berriak kontatzeko asmoarekin. Horretan diharduten emakume sortzaile eta aktibistak ikusarazteko nahiak bultzatuta.
Jardunaldiek adierazpen feministarako askatasun eremuak bultzatu izan dituzte, et,a aurten, hamazazpigarrenez, hainbat joera eta diziplinatako andreen elkargunea izan da. Erraztu egin ditu harremanak artisten eta ekintzaileen artean. Sorkuntza gune izan nahi baitu edozein planteamendu hegemoniko zalantzan jartzen duten emakumeentzat.
Dibulgazioa, praktika eta ludikotasuna ditu oinarri: aurten Ahoa narras izan du lelo. Arrastoei segika aritu dira aurreko hiru egunetan, antolatzaileek aipatu gisara, aurretik egindakoa identifikatzen baitute sarritan: «Hor zegoena jada ez da agertzen, baina hor egon zen». Marka horien inguruan hausnartzen jardun dira, «kolektiboan konpartituz, arrasto horiek sakonera eraman eta potentzia eraldatzailez gainezka dauden lekuetara eramateko».
