Hats kolpe batez

Hasi da eromena! Aurten ere milaka lagun batu dira Baionako herriko etxe aitzinean, txupinazoa barnetik bizitzeko. Leon erregearen ganberako erridauen irekitzea, suzirien dantza, bertsoa, hitzartzeak... herriko etxeko balkoian egin mugimendu bakoitzak zuen festazaleen euforia azkartzen barda.

Oihuak, irri karkailak, kantuak zein besarkadak, nagusi zen poztasunaren seinale izan ziren guztiak. Zapi gorria zerurantz altxaturik, hamar ezkila ukaldiei deika ari ziren festazaleak. Etorri ziren azkenean eta hiriko auzo nagusiak ordezkatzen dituzten hiru giltzak bota zituzten balkoitik. Aurten Natacha Saint Pier kantaria, Fabien Ontoniente film egilea eta Jean Gachassin errugbilaria izan dira protagonista.

Bestaren mundura sartzeko gakoa balitza bezala, bakoitzak hartu zuen laster bere norabidea, Baiona Txikirantz, Handirantz ala Santa Izpiriturantz. Laster bete ziren karrikak eta ostatu izkin guztiak ziren mukuru beterik. Frantziatik ferias de Bayonne delakoetara etorritakoek ere ez zuten zailtasunik ukan besta guneen atzemateko.

Hiria ez dute ezagutzen, bertako besta ohiturak ere ez, baina zuri-gorriz jantzi beharra dela badakite eta guztiak dira zuriz, zinta eta lepoko gorriarekin. Maiz bertakoak baino hobeki jantzirik gainera. Euskaraz entzundako hitz bakarrak Xumai Murua bertsolariarenak izan zituzten eta gune euskaltzaleak huts eginez gero, baliteke bakarrak eta azkenak izatea. Euskaraz egin zuen haatik txupinazo alternatiboa Gazte Asanbladak, San Andres plazan. Herriko etxearen besta eredua kritikaturik, besta herrikoiak aldarrikatu zituzten.

Milioi bat lagun batuko dira bost egunez 45.000 biztanle dituen hirian. Kanpotar anitz, baina bertakoak ere bai. Baionarrez gain, Lapurdi, Nafarroa Beherea ea Zuberoako lau xokoetarik heldu da jendea Lapurdiko hiriburura. Langileen arteko bazkaria, klasekoen arteko aperitifa ala lagun arteko poteoa, anitzek dute bertan hitzordua emanik.

Goizetik, giroa berotuz

Herriko etxearen baimena ukan gabe, goizetik hasi ziren bestan andana bat. Tabernariak azken prestaketa lanak bururatzen ari zirela, jada festazale batzuk zebiltzan goizean goiz ostatu izkinetan, garagardoa lagun.

Funtsean, horretaz kontziente da udala eta egitarau ofizialak ere hainbat ekitaldi sartuak zituen egun guztirako. Miarritzetik Baionara arteko lasterketa, piragua lasterraldia, pilota partidak ala arrautza moleta txapelketa, aspertzekorik ez zuten ukan bertaratutakoek. Poliki poliki, eguna aitzinatu arau, besta giroa nagusitu zen. Isiltasunak eta lasaitasunak haien tokia utzi behar izan zioten txarangei, trikitilariei, danborradei edota bozgorailuek bota musika ozenari. Bost egunez horrela izanen da eta astelehenean agertuko da berriz lasaitasuna.