Handienak ere erakartzen ditu

Izenak berak dioenez, haurrentzako da, berez, Haurren Eguna. Guraso ugari biltzen dira, halere, seme-alabak zaintzeko aitzakian, eta ongi pasatzen dute haiek ere. Urduritasuna, erraldoi eta musikarienganako ikusmira, ilusioa... Ezin jakin haurra edo gurasoa, bietan nor den animatuen dagoena. Haurrak heldu izatera egiten baitu jolas, eta helduak, berriz, aukera ezin hobea duelako haurtzarora istant batez itzultzeko.

Hala, haur eta guraso andana batek bete zuten atzo goizetik Baionako karrikak. Horientzatprestatzen baitute beti bestetako bigarren eguna. Goizean goizetik txistu, gaita eta txarangek hartu zuten hiria, eta alde batetik bertzera joan ziren kalejiran erraldoi txikiak eta handiak ere. Danborrada ere egin zuten haurrek, Baiona Handiko karriketan.

Zezenarengandik ihesi

Aurkakoa dioenak gezurra darabil: Baionan ere bada entzierroa. Eta biziki jendetsua, gainera. Atzo goizean egin zuten, 11:30 aldera, Baiona Ttipiko Paul Bert plazatik abiatuta Marengo zubiraino. Konplikazio ugariko korrikaldia izan zen, gainera: zezenek gibelera eta aldeetara egin zuten lasterka behin baino gehiagotan. Hori dela eta, 102 adarkada inguru eragin zituzten, eta pilaketak ere ugariak izan ziren ibilbidean zehar. Zauriturik ez zen izan batere, ordea. Zezen gurpildunak bultzatuz zihoazen helduek bakarrik izan zuten arazoa, izatekotan: arnasesturen bat edo bertze. Abantaila bikoitza dute, hala, gezurretako zezenek: arriskurik ez dute sortzen, baina haurren ilusioa bera da. Eta gurasoena ere bai.

Goizean norberak bere aukera egin ondoren —danborrada, entzierroa eta erraldoiak ordu bertsuan hasi ziren—, 12:00etarako guziak elkartu ziren Askatasunaren plazan, Leon erregea iratzartzeko. Pertsonaia maitatua dute Baionako eta inguruko herrietako haurrek goizero hiria agurtzen duen animalia. Haien irribarreetan ikus daiteke, edota plazan bildutako haurren kopuru handian. Baita haien jantzietan ere: batek baino gehiagok zuen Leon erregearen marrazkia kamiseta zurian, eta zapi gorrietan ere grabatua zuten batzuek irudia.

Indarrak hartuta, jolasa

Leon erregea agurtu ondotik Poterne gunera abiatu ziren neska-mutilak, han baitzituzten prest bazkaria eta arratsaldeko jolasak. Harresiz inguratutako belardiak osatzen du lekua, eguraldiak lagun lurrean jarrita bazkaltzeko aproposa dena. Batzuek etxetik ekarri zuten ogitartekoa, baina bertzeek ere izan zuten etxean bezala jateko aukera. Izan ere, Idoki etxe ekoizleen elkarteak banatu baitzien jatekoa haur zein helduei. Bigarren urtea dute jada herriko etxearekin elkarlanean dihardutela Haurren Egunean, eta ez dute erraza erronka: 3.000 lagun ingururi ematen diete bazkaria, Ttele Leizagoien Idokiko lehendakariak emandako datuen arabera.

Joan den urtetik, gainera, aldaketatxo bat izan dute, beraz, ezin erran iazko esperientziak balio dienik: «Iaz dena prest genuen bezperatik; aldiz, orain lekuan berean egiten dugu. Horrek kanbiatzen du». Langile aldetik, halere, kopuru bera atxiki dute: 30 bat lagun dabiltza. Haien proiektua zabaltzeko aukera ematen die Haurren Egunean bazkaria zerbitzatzeak, anitzek egiten baitizkiete galderak. Eta haiek gustura erantzun: «Mintzatu nahi duenarekin mintzatzen gara, erakusleiho polita baita guretzako». Poterne erdian izatea ere aukera ona dela uste du: «Xoko batean bagina, ez dakit etorriko liratekeen, baina hor garen artean, estimatzen dute kalitatezko eta tokiko janaria». Indarrak hartuta, leku berean ezarritako puzgarri eta jolasetara bertaratu ziren haurrak.