Usadioari jarraituz, sagarrondo bat landatu, kupeleko sagardoari lehen zurrutada eman, «Gure sagardo berria!» esan, eta jarraian hasi ohi da sagardotegi garaia. Aurtengoa ere ez da salbuespena izango: urtarrilaren 15ean hasiko da txotx garaia, eta Gure Zirkuko kideak izango dira hasiera ekitaldiko gonbidatuak, Astigarragako (Gipuzkoa) Alorrenea sagardotegian.
Aurretik, 12:00etan, aurtengo sagardoa nolakoa den azaltzeko prentsaurrekoa emango dute Erribera kulturgunean: uztaren ezaugarri nagusiak, sagardo berriaren ezaugarriak eta sagardoaren sektoreko gertaerarik garrantzitsuenak aletuko dituzte.
Ondoren, txalapartarien deiari jarraituz, sagar dantza egingo dute Alorrenea sagardotegian, eta Gure Zirkuko kideak sokadantzan parte hartzera gonbidatuko dituzte, sagardo berria dastatzeko. Upelak ofizialki irekita, gonbidatuek «Gure sagardo berria!» oihukatuko dute, eta hala hasiko da aurtengo txotx garaia. Ekitaldia biribiltzeko, ohiko sagardotegi menua dastatzeko aukera izango dute.
