Euskarazko zinemagintza babesteko eta hauspotzeko asmoz, Laburbira film laburren zirkuitua abiatuko dute gaur, Donostiako San Telmo museoan. Aurtengo aldira 35 lan aurkeztu dituzte, eta horietarik zortzi film hautatu dituzte, jendeak herriz herri ikusi ahal ditzan. Laburbira zirkuituaren 22. aldia da aurtengoa, baina aurreko urteetako helburuari eutsiko diote oraingoan ere: euskarazko lanak egiten dituzten sortzaileak eta haiek ekoitzitako film laburrak ezagutaraztea.
Aurrestreinaldia Primeran plataformak eta Taupa mugimenduak antolatu dute elkarlanean, Donostiako San Telmo museoaren laguntzarekin batera. Gaurko aurrestreinaldiak hasiera emanen dio film laburren jaialdiari: 18:30ean izango da, Donostiako San Telmo museoan, eta aurkezten diren filmen zuzendariak ere egongo dira, egindako lanaren gaineko galderak erantzuteko. Ondoren, eta apirilaren 11 bitartean, Euskal Herri osoko 51 herritan ikusi ahal izango da aurtengo film labur askotarikoen bilduma.
Aurtengoan 35 lan aurkeztu dira, eta horietarik zortzi film hautatu dituzte hainbat herritan ikusteko. Orotara, film laburren 97 minutuko sorta ikusgarria osatu dute antolatzaileek, ikusleei ahalik eta emanaldi aberasgarriena eskaintzeko asmoz. Alde horretatik, epaimahaiak herriz herri erakutsiko duten labur sorta osatu du, eta aukeraketa prozesuan, beraz, berebiziko garrantzia hartu du film labur bakoitzaren kalitateak.
Horrez gain, beste ezaugarri batzuk ere kontuan hartu dituzte lanak hautatzeko orduan: autorea emakumea edo gizona den, aniztasunari dagokionez edukia nolakoa den, landutako gaia zein den, istorioa non kokatzen den eta abar. Euskal zinemagintzaren erakusleihoa den heinean, sortzaile berrien eta profesionalen arteko oreka ere zaindu dute, guztiei beren lanak aurkezteko aukera emateko asmoz. Edozein ikuslerentzako moduko lanak dira jaialdian ikusgai egongo diren guztiak.
Zinema piztuz
Bi helburu nagusi ditu Laburbirak: euskal zinemagintza hauspotzea, batetik, zinemagileei beraien lanak erakusteko aukera emanez, eta herritarrei euskaraz sortutako film laburrak ezagutaraztea, bestetik. Hogei urteko ibilbidea du jaialdiak, eta horrela azaltzen dute Laburbirako webgunean egitasmoak izan duen bilakaera: «Euskal zinemagintzaren erakusleiho erreferentziala bihurtu da, eta zirkuitu egonkor eta zabal bat eskaintzen duen neurrian, industria osoaren pizgarri moduan ere eragiten du».
Askotariko lanak daude jaialdiko antolatzaileek osatutako bilduman, edukiz zein estiloz, eta horietako asko jada zenbait zine jaialditan saritutako lanak dira. Hauek dira, hurrenez hurren, aurtengoan ikusgai izango diren film labur batzuk: Prosopagnosia (Ekain Martinez), Plazer bat (Sonia Estevez), Europa (Ekain Irigoien), Pentsatzen dut (Karmele Mitxelena), Hor konpon (Jone Arriola), Goodbay Kepler (Nerea Ayala, Patricia Fañanas eta David Modroño) eta Utlandsk (Alba Lozano), besteak beste.
Aipatutako pelikula laburrez gain, Eneko Sagardoi aktore eta zinema zuzendariaren lehen film laburra ere hedatuko dute jaialdian: Betiko gaua. Gidoia Sagardoik berak eta Nerea Ibarzabal bertsolari eta idazleak idatzi zuten, eta Miren Gaztañaga eta Elena Irureta aktoreek jokatzen dituzte film laburreko pertsonaia nagusiak. Lanean, Mirenen eta Elenaren istorioa kontatzen da: Mirenek Elena ezagutzen du, zeinak alokairuko auto bat gidatzen baitu, eta hortik aurrera errepidetik segika hasiko zaio. Betiko gaua-k Epaimahaiaren Aipamen Berezia jaso zuen Eivissako (Herrialde Katalanak) nazioarteko zinema jaialdian, eta La Otra Mirada lehiaketako Epaimahaiaren Saria Medina del Campoko (Espainia) jaialdian.
Laburbira jaialdiaren egitaraua Taupa mugimenduaren webgunean ikus daiteke.
