Antolatzaileek film laburren «kalitate handia» nabarmendu dute. Hiru egunetan 34 ikusiko badira ere, orotara 770 film jaso dituztela jakinarazi dute: horietako batzuk Oscar eta Goya sarietarako hautagaien artean egon direla argitu dute. Horrez gain, aurtengo aldian marrazkilariei omenaldi bat egingo diete. Gaur, besteak beste, Urdin film laburra botako dute, Alberto Camposen azken lana; Gasteizko marrazkilaria 2015ean zendu zen. Korterrazan parte hartzen duten film laburrek leihaketan parte hartuko dute; aurten, 6.000 euro inguru banatuko dituzte sarietan.
Filmez gain, Korterrazak musikarekin gozatzeko parada eskainiko du. Ofizialki 20:00etan hasi arren, 22:00 arte, iluntzen duenera arte, ez dira filmen emanaldiak hasiko. Aurretik, kontzertuak eskainiko dituzte: gaur, The Excitements taldeak joko du; eta, larunbatean, Kodigo Nortek eta DJ Lorok. Bihar, musika beharrean, haurrentzako film labur sorta botako dute: Alike, Ethnophobia, La Bruxa, Lakrua, Marcianos de Marte, eta Oa lanak emango dituzte Artiumen barruko plazan.
Arabako txoko guztietan
Hiriburuan ez ezik, Korterrazak Arabako bazter guztietara eraman ditu film laburrak hil hasieratik, eta hala egingo du irailera arte. Bihar, Amurrion eta Luiaondon eskainiko dute film laburren aukeraketa bat, 22:00etatik 23:45era arte; Ondategi eta Armiñonen etzi eskainiko dituzte; eta, hurrengo ostiralean, Zurbaon eta Maeztun. Hilabete amaierara arte, beste hainbat herritan egongo da, baita abuztuan eta irailean ere.
Korterraza Txikiko filmak ere Arabako bi txokotan ikusi ahalko dira. Uztailaren 29an, Markinezen emango dituzte, eta, abuztuaren 11an, Bastidan.
