Begihandiak eta fideua, Iker Markinezek bi osagai nagusi horiekin osatu du aste honetako errezeta.
Begihandia, 1 (kilo bat ingurukoa) Txipiroi tinta 3 tomate gorri fresko 3 baratxuri ale 3 tipula eder 2 piper berde Ardo zuria, basokada bat Gatza Oliba olio birjina Ura Fideua fideoa
Begihandia izen berezia izan arren, txipiroiei horrela deitzen zaie handiak direnean. Normalean, kilo bat ingurukoa izaten da pieza bakoitza. Garbitu eta laukitan moztuko dugu, edo tiratan, nahi duzuen bezala.
Tipulak eta piper berdeak moztu, eta lapiko handi bat sutan berotzen jarriko dugu. Jarraian, lapikora olio txorrotada bat bota, eta moztutako tipula eta piperrak gehitu, baita baratxuri aleak ere, oraingo honetan osorik. Hogei bat minutuz su ertainean erregosi, eta, ondoren, ardo zuria gehitu; pare bat minutu gehiagoan sutan eduki. Ondoren, tomate aleak lau zati handitan moztu, eta lapikora gehitu. Jarraian, ura gehitu, pare bat litro, eta txipiroien tinta eta gatz pitin bat ere bai. Beste ordu laurden batez irakin. Segidan, saltsa pasatu egingo dugu, iragazkia eta irabiagailua erabiliz.
Beste lapiko handi batera olio txorrotada bat bota, eta, ondo berotuta dagoenean, begihandi zatiak gehitu. Gatz pitin batez hornitu eta 10 bat minutuz erregosi, taparik gabe eta su bizian. Jarraian, prestatu dugun saltsa beltza gehitu lapikoan, ur pixka batekin batera, eta ordubetez eduki su motelean irakiten, begihandiak bigundu daitezen, eta saltsa loditu. Sumatzen badugu saltsa lodi samarra dela, ur pixka bat gehitu behar zaio, fideua egiteko ez baita komeni saltsa oso lodia izatea.
Lapiko zabal batean, paella estilokoan, 400 gramo fideua gehitu, oliba olio txorrotada batekin. Berotzen jarri, eta, fideua dantzan hastean, gehitu begihandiak eta saltsa, behar adina. Normalean, fideua estaltzeko adina saltsa nahikoa izango da.
Ez irakin 5 edo 10 minutu baino gehiago. Erositako fideua motaren arabera, gomendatzen duten denbora tartean irakin. Ondoren, pare bat minutuan utzi, eta platera prest izango dugu zerbitzatzeko eta dastatzeko.
