Euskal hedabideen behatokiak leiho bat zabalduko die ikertzaile berriei

Hekimen euskal hedabideen elkarteak eta EHU, Deustu eta Mondragon unibertsitateek elkarrekin duten proiektu bat da euskal hedabideen behatokia. Euskaraz ari diren komunikabideen eragin kuantitatiboa eta kualitatiboa neurtzeko tresna bat izateko bokazioz sortu da, eta jada martxan du webgunea: Behategia.eus. Atzo aurkeztu zuten webgunea, Leioan (Bizkaia), Euskal Herriko Unibertsitateko campusean.

Gorka Salces EHUko Nor ikerketa taldeko kide eta euskal hedabideen behatokiko koordinatzaileak azaldu duenez, aurkezpena EHUko campusean egin izanak harremana du ikerlari berriak proiektura erakartzeko xedearekin. Euskarazko komunikabideen sektoreak atzemandako behar bati erantzuten dion topagune bat da Behategia. «Akademiaren eta komunikazio jardun profesionalaren arteko lotura estutzeko beharrari erantzuten dio», esan du Salcesek.

Etorkizunari begira, erronka eta helburu jakin batzuk ditu euskal hedabideen behatokiak: «Batetik, aztertu nahi dugu komunikabideek zer ekarpen egiten dioten hizkuntza gutxituen biziberritze prozesuari. Beste ildo estrategikoetako bat da euskarazkohedabideen sektoreak komunikazio paradigma berrian izan ditzakeen arazoak eta aukerak identifikatzea». Aldaketa teknologiko berriak ikusita, alternatibak eta irtenbide batzuk proposatu nahi dituztela iragarri du Nor ikertaldeko kideak. «Audientziak neurtzeko moduak birpentsatu nahi ditugu, eta neurketa berrietarako proposamenak egitea hausnartu». Politika publiko berriak ezartzeko gogoetak ere sustatu nahi ditu Behategiak.

Datutegi bat, webgunean

Behategia.eus atarian, euskarazko komunikabideekin lotutako material ugari eta mamitsuak aurki daitezke. «Txostenen atalean, azkeneko urteetan alor akademikoan euskarazko komunikabideen bueltan egin diren ikerketa batzuk bildu ditugu», azaldu du Salcesek. Lan horiek webgunean bertan irakur daitezke, baita deskargatu ere. Mapen atal bat bada, euskarazko hedabideen inguruko estatistikekin. 2010etik 2015era egindako hainbat ikerketa ere badira, ez bakarrik euskarazko komunikazioaren ingurukoak. «Lanen datu base bibliografiko bat dago».

Eta datutegi osatu batera jo daiteke webgunean. «Datutegian, euskarazko komunikabide guztien zerrendaz gain, horien mapa ikus daiteke. Hau da, hedabide bakoitzak zer hedapen esparru duen, oinarrizko datu batzuekin batera».