Etxez etxe dirua biltzen ari da Xiberoko Botza, abuztura bitarte

Xiberoko Botza irratia etxez etxe dirua biltzen ari da, beste urte batez. Maiatzaren 28an hasi ziren, eta abuztua heldu baino lehen amaitu nahi dute. Behintzat, hori da asmoa, Iulen Guiresse irratiko langilearen arabera. Baina lana luzatu egiten zaie, Guiressek aipatu duenez.

Diru bilketarekin irratiaren finantzaketaren zatirik handiena lortzen dutela azaldu du: «Laguntza bat ematen du Frantziako Gobernuak. Diruaren %30 lortzen dugu horrekin, eta gainontzekoa, autofinantzaketaren bidez». Batez ere, diru bilketaren kanpaina garrantzitsua da lanpostuak bermatzeari begira. Xiberoko Botza 1982. urtean sortu zuten, eta harez geroztik egiten dute urtero diru bilketa.

Hiru herritan jada igaro dira etxez etxe; «herri txikietan», Guiressen hitzetan. Lehen eta oraingo egoerak alderatu ditu. Izan ere, duela urte batzuk 25 mila euro sartzen ziren diru bilketarekin Xiberoko Botzan. Egun, 13.000 eta 18.000 euro artean jasotzen dute herritarrengandik.

Herritar bakoitzak jartzen duen diru kopurua hautazkoa da. Horren truke, opari bat egiten diete. Aurten, Zuberoako kantu txapelketako diskoa.

Denek, ordea, ez dute euskarazko irratiaren alde apustu egiten. Xiberoko Botza lagundu beharrean, herritar askok dirua bertako irrati frantses bati ematen diotela ohartarazi du, eta horrek kalte egiten die.

Diruaz harago, ordea, zuberotarrekin zuzeneko kontaktua edukitzeko parada ematen die etxez etxe joateak. «Jendeak gustuko du gu haiengana joatea. Herri batzuetan oso polita da. Ez dute atean jotzera itxoiten; sartzeko erraten digute, eta segituan mahai gainean jartzen digute tragoa eta janaria. Bikaina da», adierazi du irratiko kideak.

Herritarrekin zuzenean egoteak irratiko igorle eta hartzaileen hartu-emana ere sustatzen du. «Jendearekin hitz egiten dugu,eta baditugu kritikak, oharrak edota aholkuak. Denetariko iritziak jasotzen ditugu, eta interesgarria da», gaineratu du Guiressek. Diru bilketa egiteko langileak joan ohi dira zuzenean etxeetara, baina laguntzaileak ere badituzte.

Zuberoan 5.000 euskal hiztun inguru daudela azaldu du Guiressek. «Horietatik erdiek entzuten dute Xiberoko Botza», erantsi du. Duela hogei urte egin zuten ikerketa baten arabera, Ipar Euskal Herrian irratia euskaraz entzuten zuten 72.000 lagun zeuden: 45.000 Lapurdin, 19.000 Nafarroa Beherean eta 8.000 Zuberoan. Guiressek uste du datu horiek beherantz jo dutela azkeneko urteetan.