Estatu Kontseiluak esan du euskarak bere tokia behar duela France TVn

Frantziako Estatu Kontseiluak arrazoia eman dio Euskal Konfederazioari, eta adierazi du France Televisions sozietate publikoak tokiko hizkuntzetan eginiko programen ekoizpen eta zabalpen zerbitzu publikoaren ardura duela. «Tokiko hizkuntza bakoitzari dagokion emisio denboraren partea finkatzea zerbitzu publikoaren antolaketaren ardurapean da», gaineratu du kontseiluak. Haren aburuz, programetan euskararen presentzia handitzearen ukatzea auzitegietan salatu daitekeen gaia da, «botere gehiegikeriagatik». Euskal Konfederazioak «lehen garaipentzat» jo du Frantziako Estatu Kontseiluaren erabakia, «France Televisionsek ezingo baitie bere ardurei ihes egin, eta arrazoitu egin beharko dituelako bere programazio hautuak, eta esplikatu euskara zergatik diskriminatzen duen».

2013ko maiatzaren 21ean, Euskal Konfederazioak France Televisions taldearen kontrako salaketa bat jarri zuen Parisko Administrazio Auzitegian, «eskubide berdintasuna» hausteagatik, telebistan publikoan euskarari ematen zaion tarte «ezin txikiagoagatik». Handik gutxira, ekainaren 26an, Parisko Administrazio Auzitegiak Euskal Konfederazioaren eskaera atzera bota zuen, eta esan zuen eskualdeetako kulturaren sustapena ez zela botere publikoen ardurakoa. Ildo beretik joan zen Parisko Dei Auzitegia, 2015eko apirilaren 7an, eta Euskal Konfederazioaren helegitea baztertu zuen.

Auzitegietako bi erabaki horiek atzera bota ditu, ordea, Frantziako Estatu Kontseiluak. Parisko Dei Auzitegiaren erabakia desegin du modu horretan kontseiluak, Euskal Konfederazioaren eskaerekin bat eginez.

Prozeduraren iraupena «biziki luzea» izaten dela ikusirik, Euskal Konfederazioak France Televisions talde publikoari galdegin dio beharrezko neurriak «lehenbailehen» hartzea, euskarak telebistako zerbitzu publikoan «zor zaion toki guztia» izan dezan. Auziaz galdetu du BERRIAk France3n, baina ez du erantzunik jaso.

Urtean hamar ordu

Tarte txikia du euskarak Frantziako telebista publikoan. Euskal Konfederazioaren arabera, urte osoan hamar ordu baino gutxiago dira euskarazko emankizunak. France3 Euskal Herri-Pays Basque albistegi laburrean bost erreportaje sartzen dituzte, eta horietako gutxi batzuk tarteka euskaraz izaten dira —frantsesezko azpidatziekin—. Larunbatetako magazinean, urteko ekoizpenaren laurdena euskaraz izaten da. Bestalde, euskarazko Txirrita magazina ematen dute hiru igandetik behin —26 minutuko iraupena du—. Okzitanierazko Viure al Pais saioarekin partekatzen du tartea Txirrita-k.

Euskal Konfederazioaren datuen arabera, eskaintza zabalagoa egiten dute Frantziako telebista publikoan beste hizkuntza batzuetan: urtean, 95 ordu korsikeraz, 92 ordu alsazieraz eta 65 ordu bretoieraz.