Aurten, Udaletxe plaza balkoitik ikusiko dute Duguna Iruñeko udal dantza taldekoek. «Oso pozik gaude. Aitortza gisa hartzen dugu hau, hiriaren opari gisa, gure 75. urteurrenean», esan du Aritz Ibañez Dugunako zuzendariak pasa den asteko prentsaurrekoan. Suziria jaurtiko duena aukeratzeko, 10.159 iruindarrek eman zuten botoa, eta Dugunak 3.971 herritarren babesa jaso dute: boto guztien %39. Joseba Asiron alkateak dantzariak zoriondu zituen: «Uztailaren 6an txupinazoa jaurtiko dutenek guztiok ordezkatzen gaituzte».
Duguna uztailaren 6an izango da udaletxeko balkoian, baina Ibañezek eskerrak eta zorionak eman zizkien finalean egon ziren beste elkarteei: Iruñeko San Joan Jainkoarena ospitalea (3.466 boto), Fraile Anaiak gaiteroak (1.141), Nafarroako Emakume Desgaituen Elkartea (Amusdina; 794 boto), eta Nafarroako Euskal Pilota Federazioa (787 boto).
Oraindik ez dute erabaki nork botako duen txupinazoa, baina emakume dantzari batek eta gizon dantzari batek botatzea nahi dute. Ordezkarien jantzia oraindik erabaki beharko dute, Ibañezek azaldu duen bezala: «Dantzarioi askotan esan digute sanferminetarako jantzita goazela, gure ohiko jantziak dauzkagunean».
Duguna dantza taldearen ibilbidea duela 75 urte hasi zen, 1949ko azaroaren 29an, San Zernin egunean, alegia. Hamasei dantzarik egin zuten taldearen lehen emanaldia, Iruñeko Udaletxe plazan. Orain, 150 bazkide dira, eta 50 dantzari baino gehiago. «Eskertuta gogoratu nahiko nituzke gure dantza taldeko kide izan diren dantzariak eta musikariak, 75 urteko ibilbide hau gaur eguneraino ekarri duten guztiak», esan du Ibañezek.
Uztailaren 7an dantzatu ohi dira Iruñeko Udal plazan, eta batzuetan balkoira begiratzeko ohitura dutela esan zuen zuzendariak: «Orain, jakin nahi dut nola ikusten den egoera hori kontrako norabidean; balkoitik plazara. Hori egiteko aukera eman digute herritarrek».
