Bihar arte, hamaika ikuskizun Kaleka jaialdian, Lekeition

ANTZERKIA. Hiru egun eta hamalau ikuskizun; denak kalean, ohi bezala. Azken bi urteetan pandemiak eragindako gorabeheren ondoren, ohiko itxura hartuta hasi zen atzo Lekeitioko (Bizkaia) Kaleka kaleko antzerki jaialdia. Igandera arte, Euskal Herriko eta Herrialde Katalanetako, Galiziako eta Espainiako konpainiek euren obrak erakutsiko dituzte jaialdiaren 32. aldian. Azken urteetan bezala, hiru ataletan banatu dituzte ikuskizunak. Kaleka Ofiziala sail nagusiak biltzen ditu obra gehien: besteak beste, Markeliñeren Psike, Ambae Companyren We All Live In A Box eta Kaputen Inkululeko. Sail ofizialean izango dira, halaber, Lekittoko Deabruak; jaialdian sortu zen taldea, orain hamar urte, eta orduz geroztik prestatu dituzten obra guztien zatiekin osatutako ikuskizuna taularatuko dute bihar, 23:30ean. Kalekaz Blai eta Kaleka Scratch sailetan ere beste hainbat lan izango dira.