Ez da zoriz heldu Calexico taldearen musika Breaking Bad telesailaren musikara. Saileko umore beltzak bat egiten du taldearen basamortu beltza estiloarekin. Horrela definitu dute askok, behintzat, Arizonako (AEB) laukotearen musika. Gaur arituko dira, Blind Pilot taldearekin batera, Donostiako Viktoria Eugenia antzokian.
Talde zabalagoa ekarriko dute Joey Burns abeslari eta gitarra jotzaileak zein John Convertino perkusio jotzaileak. Biak dira Calexicoren sortzaileak, eta horiekin batera Paul Niehaus gitarrista, Jacob Valenzuela teklatu jotzailea, Michael Carbajal tronpetista, Sergio Mendoza soinu jotzailea eta Chris Giambelluca baxu jotzailea arituko dira.
Disko atera berria dakarte: Algiers. Mugaldeko taldea da Calexico, eta mugaldekoa haien musika. AEBetako hegoaldeko eta Mexiko iparraldeko, tex-mexa eta mariachia elkartzen dituzte, Rio Grandeko bi bazterren arteko zubi gisa.
Blind Pilot taldeak zabalduko du kontzertua. Portlandik (AEB) datoz, eta folk independentea sortzen dute. Duela urtebete pasatxo kaleratu zuten bigarren disko luzea: We Are The Tide.
Gaurko kontzerturako sarrerak 34, 27 eta 21 euroan jarri dituzte salgai.
CALEXICO ETA BLIND PILOT
Noiz. Gaur, 20:00etan.
Non. Viktoria Eugenia antzokian, Donostian.
Basamortu beltzeko soinuak
Calexico eta Blind Pilot AEBetako folk independenteko taldeak arituko dira gaur Donostian
Iruzkinak
Ez dago iruzkinik
Ordenatu
