Bakailaoa aukeratu du Iker Markinezek urte berriari ekiteko.
4 puska bakailao Pipermorro bat 2 piper berde Tipula bat 400 gramo leka Baratxuri buru bat Gatza Oliba olioa Kaiena piperra
Piperrada prestatzea da lehen pausoa. Tipula zuritu eta laukitan moztu, baita piper gorriak eta berdeak ere. Gatza eta oliba olioa gehitu horri lapiko batean, eta erregosi su ertainean, ordu erdiz, tapaz estali gabe. Horrela, barazkien ura ongi lurrunduko da. Ondoren, sua itzali, eta bertan gorde.
Baratxuriak zuritu, eta lapiko batean osorik jarri. Oliba olio txorrotada on bat gehitu. Sutan jarri hamar minutuz, suabe-suabe oliotan konfitatzeko. Sua itzali, eta bakailao takoak bertan sartu, azala gora begira dutela. Lehen bost minutuetan, sua itzalita eduki; ondoren, su oso motelan eduki beste bost minutuz. Atera, eta hozten utzi. Horrela, bakailaoa konfitatuko dugu.
Lekei puntak kendu, eta juliana moduan moztu. Ondoren, galdarraztatu. Horretarako, lapikoan ura jarri, gatz pittin bat bota, eta irakiten hastean, bost minutuz egosi. Atera, eta ongi hoztu.
Lekak lapiko zabal batean ipini, eta konfitatu dugun bakailaoaren olioa gehitu. Sua bizitu eta berotzen denean, bakailao tako bakoitza hiru zatitan moztu, eta lapikoan jarri, leken gainean eta azala gora begira dutela. Oraingoan, tapaz estali. Bitartean, piperrada berotu.
Platereratzeko, lehenik lekak jarri platerean; gainean, piperrada, eta azkenik, gainean, bakailao zatiak. Olioz busti nahi izanez gero, gomendatzen dizuet konfitatzeko erabili dugun lapikoko olioa erabiltzea.
