Bi minutu eta 41 segundo. Denbora hori behar izan dute Cebada Gagoko zezenek San Domingoko ukuilutik zezen plazara bitarteko 800 metroak osatzeko. Arriskutsu ospea izan ohi dute Medina Sidoniako ganadutegiko (Cadiz, Espainia) zezenek Iruñean korrika egin ohi duten bakoitzean, baina aurtengo bigarren entzierroan ez da adarkaturik izan.
Astelehena izanagatik, jendetsua izan da bigarren entzierroa. JON URBE / FOKU
Zezen batek keinu egin du korrikalari bat harrapatzeko. AINHOA TEJERINA / EFE
Hainbat korrikalari lurrera erori dira, zezenek emandako adarkaden ondorioz. AINHOA TEJERINA / EFE
Korrikalari bat bi zezenengandik oso gertu izan da, hauek saihestea lortu badu ere. IÑIGO URIZ / FOKU
Hainbat korrikalari Cebada Gago gainadutegiko zezen batetik ihesi. IÑIGO URIZ / FOKU
Mercadereseko bihurgunean blusa urdina daraman gizonak izandako erorketaren sekuentzia (I). VILLAR LÓPEZ / EFE.
Mercadereseko bihurgunean blusa urdina daraman gizonak izandako erorketaren sekuentzia (II). VILLAR LÓPEZ / EFE.
Korrikalariak zezenengandik oso gertu, zezen plazara hurbiltzen ari direla. JON URBE / FOKU
Korrikalari bat lurrean, eskuak buruan dituela, jasotako adarkadaren ostean. VILLAR LOPEZ / EFE
Zezen plazara sartu baino lehen jasotako adarkadak. JESÚS DIGES / EFE
Neska bat, atzean duen mutilak jasotako adarkadaz libratu dela. JESÚS DIEGES / EFE
Neska batek zezen plazako sarbidean izan duen erorketa. JESUS DIGES / EFE.
Suziriak jo, eta, beti bezala, San Domingoko aldapan gorantz egiterakoan, oso azkar aritu dira sei zezenak. Haietako bi atzerago geratu dira, eta alde bietara zuzendu dute begirada. Ez dute, baina, imintziorik egin mehatxua errealitate egiteko.
Aurreranzko bidean, Mercadereseko bihurgunean sortu da tentsio handiko beste uneetako bat. Blusa urdin argia zeraman korrikalari batek estropezu egin du bihurgunean ordurako erorita zegoen zezenarekin, eta, altxatzerakoan, adarra paretik pasatu zaio. Zezena irauli egin da, baina aurrerantz jo du, alboan zuena panpina bat balitz bezala atzean utzita.
Korrika egiteko hutsuneak sortu dira Cebada Gago zezenen aurrean, baina jendetza egon da gaur ere. JON URBE / FOKU
Estafeta kalean, taldeak sakabanaturik egin du aurrera. Ez da bezperako jendetzarik izan, baina jende ugari zegoen ibilbide osoan. Zezenen alboan korrika egiteko parada izan dute haietako batzuek.
Telefonicako bihurgunean multzo bat osatu da, baina zezenek ez dute harantz jo. Atzetik zihoazenek, joaldunen arrastoa galdu arren, aurrera egin dute, alboetan zuten jendetzari erreparatu gabe.
Plazara oso sakabanaturik heldu dira, eta zezenetako bi, harea zapaltzearekin batera, jendeari begira hasi dira, eta imintzioa egin dute haienganantz jotzeko. Palmosillakoek igandean plaza osoari egindako bi biren oroitzapena oso gogoan izan dute denek. Azkenean ukuiluetara zuzendu dituzte bi zezen horiek. Zezenetako bati nabari zitzaion ezkerreko adarra gaizki zuela. Ziurrenik, bizitza luzatu ahalko du istripu horren ondorioz, ez baita izango arratsaldeko zezenketan.
