Azalorea, garaiko produktua, eta arroz odolkia oinarri hartuta prestatu du Iker Markinezek aste honetako errezeta.
Azalorea
Tipula
Arroz odolkia
Oliba olioa
Ezpeleta piper hauts gorria
Azalorea kontu handiarekin puskatan zatitu, eskuarekin, labana erabili gabe. Ahalik eta zati berdintsuenak egin, horrela zati guztiak berdin egosteko. Lapiko bat urez bete, gatz pittin bat gehitu, eta, irakiten hastean, gehitu azalore puskak. Gutxi gorabehera, 15 edo 20 minutuz egosi, pusketen tamainen arabera. Ez da komeni gehiegi egostea eta puskak bigunegiak gelditzea.
Bitartean, tipula zuritu, eta juliana moduan moztu. Zartagi batean, oliba-olio txorrotada batekin eta gatz pixka batekin batera erregosiko dugu. Oraingo honetan, tapa jarrita eta su oso motelean, tipulak kolorerik har ez dezan; 30 edo 40 minutu inguru. Ondoren, gorde.
Arroz odolkia xafla lodietan moztu. Ondoren, azala kendu. Zartagi batean oliba-olio tanta bat bota —odolkiak berak ere badu koipea eta nahikoa izango da—, eta zartagian frijitu bi aldeetatik, su ertainean. Azala kendua izaki, frijitzerakoan odolki xaflak ez zaizkizgu puskatuko. Frijitu, eta platera muntatzen hasiko gara.
Lehenik, tipula goxatua platerean pilatu, lau bat menditxotan. Tipula pila bakoitzaren gainean azalore pusketak kokatu, eta azalore tarteetan arroz-odolki xaflak. Oliba-olio txorrotada fin bat gehitu, eta, azkenik, plateraren bueltan Ezpeleta piper hautsa bota.
