Baionako bestek badute plan B: Baionako besta alternatiboak Patxa plazan. Bertaratzen denak euskal musika eta giroa atzemanen ditu, beti bezala: besta herrikoi, euskaldun eta feministak. Azpimarratu dute euskararen eta euskal kulturaren erakuslehio izan behar direla Baionako bestak. Patxa plaza animatuan eman dituzte 2022ko Baionako besta alternatiboen berri, musikaren besta ospatu aitzintxo.
Lukas Hiriartek azpimarratu du hiru urtez bestarik egin ez izanak eragin diola antolaketari. Alde batetik, Baionako Zizpa gaztetxean belaunaldi berria etorri baita: “Gazte asko jin da eta zaharragoek utzi dute. Kide gehiago gara eta biziki gazteak”.
Bertzalde, gehitu du pandemiaren eraginez behar izan dituztela berrasmatu eragiteko manera berriak: “Testuingurua berezia izanen da aurten, bestetan jende gehiago”. Hala ere, lagun kopuru emendatzeak ez die xuxenean eraginen Baionako besta alternatiboei: “Patxa plazan espazioa mugatua denez, berez mugatuko da ere jende kopurua: plaza betea delarik, betea da. Baina Baionako bestak orokorrean jendetsuagoak izanen dira”. Hartara, bereziki aurten protokolo feminista aplikatuko dute Patxa plazan, balizko eraso batean erasotzailea kanporatuz. “Jende gehiagorekin horrelako erasoek probabilitate handiagoa dute, bestak eroagoak izan ohi baitira”.
Besta alternatiboak eta ingurumena eskuz esku joanen dira, zainduko baitute arlo hori bereziki: “ Gure ildo ekologistari garrantzi gehiago ezarri nahi diogu, idorteak kontutan hartuta ohartzen ari gara klima aldaketak baduela eragina denetan, Baionan ere, beraz oroitarazten dugu Baionako besta kontsumistak baduela horretan ere eragina”. Lili Iriartek zehaztu du jadanik badutela usaia tokiko mozkinak saltzeko, baina horrez gain, aurtengo berritasuna salatu du: “Indar berezia eginen dugu apainketan: material berrerabilia erabiliz, plastiko gutxiago, banderola gutxiago... Geroz eta gehiago proposatuko dugu halakorik, antolaketa hobetuz, urtez urte, gure aztarna ekologikoa murriztera engaiatu baikara ”. Zizpa gaztetxeko kideek besta herrikoi eta arduratsuak nahi dituzte, baina horretarako, herritarren parte hartzea beharrezkoa dela uste dute, orain ez bezala, herritar talde “murritza” baita antolatzaile: “Herritarrak kontsumitzaile soilak bezala kontsideratuak dira, eta horrek gain kontsumoa eta arduragabekeriak eragiten ditu”.
Egitarauari dagokionez, asteazkenean gaualdi “lasaiagoa” iragarri dute, Ødeiren kontzertuarekin.
Ortzegunean “cover” gaualdia kantuak berrartzen dituzten taldeek animatuko dute. “Ortziralea eta larunbata zinez euskal kantu eta giroan geldituko dira”, azpimarratu du Iriartek. Baztertu gabe gauero “kalitatezko” DJak ariko direla. Presoen aldeko igandeko bazkaria ere juntatuko zaio egitarauari. Eta, ortzegunean, haurren egitaraua animatuko du Gaia elkarteak, euskal jokoak proposatuz.
Larunbateko bazkaria lekutu dute egitarautik: “Gazteen egunean bazkaria egiten genuen, aurten, ordea, ez; geroz eta jende gutiagok baitzuen parte hartzen”. Segur aski pintxoak prestatuko dituztela.
