Urte bukaerarekin batera heldu ohi da Pirritx, Porrotx eta Marimototsen lan berria, eta aurten ere ez diote egutegiari hutsik egin. Dantzan datoz pailazoak oraingoan eta dantzan jarriko dituzte ingurukoak ere, Euskal Dantzen tradizioari eusteko asmoz.
Proiektu hau, aurrekoak bezala, talde lana izan da eta pailazoekin elkarlanean aritu dira, besteak beste, Vanesa Castaño eta Jon Maya dantzariena eta Leire Bilbao idazlearena —azken horrek sortu ditu doinuen hitzak, pailazo taldearekin elkarlanean—. Maite Mutuberria ilustratzailea eta Xabier Zabala musikaria ere izan dituzte bidelagun.
Bizi dantza diskoaren hamahiru abesti eta hamahiru kantukontuekin batera, Irri dantza diskoa opari jasoko dute erosleek. Ikuskizuna bera, berriz, gaur arratsaldean estreinatuko dute Eskoriatzako kiroldegian (Gipuzkoa), arratsaldeko 17:30ean.
