Ezinean jarraitzen du Realak. Hutsean berdindu du gaur gauean Cadizen aurka Anoetan. Talde txuri-urdinak bolada txarra harrapatu du, azken sei partidetan sei puntu bakarrik eskuratu baititu: lau etxetik kanpo, eta bi etxean. Izan ere, hiru jardunaldi daramatza bere zaleen aurrean irabazi gabe. Gaur, nagusi izan da, baina eskas aritu da erasoan. Puntu bakarra lortuta, Atletico Madrilek gaindi dezake bihar, eta Betis puntu bakarrera jar dakioke igandean.
Imanol Alguacil haserre azaldu zen taldea ez zelako bete-betean aritu Valentzian. Gaur, ordea, gogotsuago aritu da, baina eraginkortasunik gabe. Hasieratik nagusitu da, berehala egin baita baloiaren jabe. Hala ere, kosta egin zaio gol aukera garbiak sortzea, ez baita gai izan Cadizen defentsan zirrikituren bat topatzeko. Brais Mendezek izan du lehen aukera, 40. minutuan. Urrutitik jaurti du falta bat, eta Ledesmak ozta-ozta urrundu du baloia. Carlos Fernandezek gertuago izan du gola bost minutu geroago. Bakarrik geratu da Ledesmaren aurrean, baina gutxigatik bota du kanpora baloia.
Atsedenaldiak ezer gutxi aldatu du: Realak aginte makilari eutsi dio, baina arriskurik sortu ezinik jarraitu du. Zerbait aldatu nahian, Imanolek Silva eta Sorloth zelairatu ditu 60. minutuan, Brais Mendezen eta Carlos Fernandezen ordez. Aldaketak ez du ezer aldatu. Are gehiago, Roger Marti gola sartzear izan da 67. minutuan, txuri-urdinen defentsaren hutsa baliatuta, baina haren jaurtiketak zutoina jo du.
Imanolek aldaketak egin ditu berriro: Cho eta Sola zelairatu ditu 80. minutuan, Oiartzabalen eta Gorosabelen ordez. Alferrik. Realak ez du gertu izan gola. Azkenean, berdinketa, eta txuri-urdinak berriro burumakur. Burua altxatu beharra dute, datorren ostegunean Erroman ariko baitira, Europa ligako final-zortzirenetako joaneko partidan. Ez dirudi unerik onena halako erronka handiari aurre egiteko. Baina akuilu ere izan daiteke. Horretarako, ordea, gora egin beharra dute. Badu lana Imanolek.
