Xarles Bidegain eta Andoni Sagarna euskaltzain emeritu bilakatu izanak utzitako hutsunea bete dute Itxaro Borda idazleak eta Andres Alberdi hizkuntzalariak. Donostiako udaletxean egindako osoko bilkuran hartu dute erabakia euskaltzain osoek.
Euskaltzaindiak urriaren 28an Gasteizko ordezkaritzan egindako bilkuran proposatu zituen Borda eta Alberdi karguak hartzeko hautagai. Orain, izendapenak eginda, zortzi hilabeteko epea izango dute sarrera hitzaldiak prestatzeko.
Alberdi Getarian (Gipuzkoa) sortua da, 1950ean. Filosofiako lizentziaduna da, eta irakaskuntzan 38 urtean aritua. Elgoibarko Institutuan, Euskara eta Literaturako katedraduna izan zen 1982tik 2011. urtean erretiroa hartu arte. Euskaltzaindiaren Zientzia eta Teknika Hiztegia Biltzeko lantaldeko partaide da.
Itxaro Borda Baionan sortua da, 1959an. Historiako goi mailako ikasketak egin zituen, eta gaur egun postari ogibidetik erretiratua da. Idazlea da, poeta, artikulugilea, eta abesti askoren hitzak idatzi ditu Euskal Herriko hainbat musikarirentzat. Oso gaztea zelarik hasi zen izkiriatzen Herria astekarian. Denera hamalau eleberri idatzi ditu. Euskaltzain urgazle izendatu zuten 2021ean.
