Aurten, 40.000 lagunek baino gehiagok igaro dute Mantxako kanala ontzi txikietan, Frantziatik Erresuma Batura. Iaz, 28.526 izan ziren, eta, duela bi urte, 8.404. Kopuru horiek agerian utzi dute geroz eta migratzaile gehiagok egiten dutela itsasoko bide hori, eta Parisek zein Londresek erabaki dute orain arteko lankidetza are gehiago indartzea. Horren ondorio da bi gobernuek gaur sinatu duten akordioa: kontroletarako patruilak 200dik 300era igoko dituzte, horretan parte hartuko duten polizien kopurua %40 handituko dute eta Erresuma Batuak operazio horiek finantzatzeko diru gehiago emango dio Frantziari, 63 milioi eurotik 72,2 milioi euro ingurura igoko baitu funtsa.
Parisek eta Londresek adosturikoaren arabera, lehen aldiz, Erresuma Batuko agenteek ere parte hartuko dute Mantxako kanaleko kontroletan —oro har, Frantziako hondartzetan egingo dira—, eta, horietan, are gehiago baliatuko dira teknologiaz; esaterako, droneak eta zaintzarako kamerak erabilita. Helburua argia da, itunean jasota dagoenez: migrazio bide hori «ez-bideragarri» bilakatzea, aurrez saiakerak egin diren arren, kanala gurutzatzeko saiakerak «areagotu» egin baitira. Rishi Sunak Erresuma Batuko lehen ministroak esan du «konfiantza» duela «[Mantxako kanaleko migrazio] kopuruak txikitu egingo direla».
Sandhurst Akordioaren eguneraketaren aurrekari garrantzitsuena iazko azaroaren 24a da, egun horretan 27 lagun hil baitziren itota Mantxako kanalean, haien ontzi puzgarria hondoratu zenean. Emmanuel Macron Frantziako presidenteak nazioarteko lankidetza eskatu zuen orduan egoerari aurre egiteko, eta Londresek teknologia eta agenteak eskainiz erantzun zion; itunak bi proposamen horiek hartu ditu kontuan, baita bi herrialdeen informazioa are gehiago trukatzea eta komunikazioa hobetzea ere.
Suella Braverman Erresuma Batuko Barne ministroa Parisen izan da hitzarmena sinatzeko, Gerald Darmanin Frantziako homologoarekin batera, eta jakinarazi dute dokumentuan islatu dutela lankidetzaren beste helburuetako bat: «kriminalitate antolatua eta errazte sareak desegitea».
Londresek kritika asko jaso ditu asteotan, Manston migrazio zentroa (Kent, Ingalaterra) gainezka baitago, eta asilo eskariak betetzeko denbora asko behar baitute —iragan ekaineko datuen arabera, 103.000 eskari erabaki baten zain zeuden—; kritikoen arabera, horrek kostu handia dakar berekin, bien bitartean eskatzaileei ostatu eman behar baitzaie. Hain justu, parlamentuko Barne Aferen Batzordeak iragan hilabetean jakinarazi zuen Erresuma Batua zortzi milioi euro ari dela gastatzen egunero horientzako hoteletan.
Horri begirako beste erabaki baten berri iragan urri hasieran eman zuen Bravermanek, Alderdi Kontserbadorearen konferentzian, han azaldu baitzuen asiloa debekatu nahi diela Mantxako kanala igarotzen duten etorkinei —garai hartan Liz Truss zen gobernuburua—.
Boris Johnson lehen ministro zela, Erresuma Batuko Gobernuak beste erabaki gatazkatsu bat hartu zuen migrazioaren aferan: asilo eskatzaileak Ruandara bidaltzea. Azkenean, iragan ekain hasieran, Giza Eskubideen Europako Auzitegiak bertan behera utzi zuen plan hori, eta ez da atera aurrez ikusitako hegazkinik. Politika horrek bere horretan jarraitzen du, eta Sunakek ez du zehaztu zer egingo duen horrekin.
Macronek eta Mattarellak «erabateko lankidetza» nahi dute
Iparraldeko mugarako erabaki hori hartu aurretik, hegoaldekoan, Frantziak baimena eman zuen, joan den ostiralean, Ocean Viking-eko 234 migratzaileak porturatzeko. Paris kritiko agertu zen Giorgia Meloni lehen ministroa buru duen Italiako Gobernuarekin, ontzi horri ezezkoa eman ziolako, eta adierazi zuen erabakiak «ondorio oso larriak» izango dituela Erromarekiko harremanetan. Gaur, berriz, Macronek eta Sergio Mattarella Italiako presidenteak «erabateko lankidetza» aldarrikatu dute migrazio gaietarako.
Italiako estatuburuaren bulegoak azaldu duenaren arabera, bi buruzagiek esan dute Frantziaren eta Italiaren arteko harremana garrantzi handikoa dela, eta bien arteko koordinazioa eta lankidetza ezinbestekoa dela. Ikusteko dago zein den Meloniren iritzia, iragan astean adierazi baitzuen Parisen erreakzioa «justifikaziorik gabea, erasotzailea eta ulertezina» izan zela.
Europako Batasuneko estatu kideetako Atzerri ministroak gaur dira biltzekoak, eta, saio horren aurretik, Antonio Tajani Italiakoak azaldu du ez dutela «polemikarik» nahi Frantziarekin, baina «Italiaren arrazoiak defendatu behar» dituela.
