EH Bilduk maiatzaren 27an eta 28an Iruñean egingo duen udalen lehen konferentzia aurkeztu du, I. Konferentzia Munizipalista izenburupean. Onintze Oleaga EH Bilduko Udalgintzako arduradunak, Nagore Alkorta Azpeitiko (Gipuzkoa) alkateak eta Idoia Buruaga Elorrioko (Bizkaia) alkateak aurkeztu dute. Azpimarratu dutenez, konferentzia «inflexio puntu» izatea nahi dute EH Bilduk herrietan egiten duen lanean, eta «aurrerapausoa euskal errepublika libre eta berdinen eraikuntzan». Bertan «ehunka alkate eta zinegotzi» elkartuko direla aurreratu du Oleagak. Besteak beste, pandemiaren ondoren harremanak saretzeko batuko dira, egindako lan politikoa, garatutako proiektuak eta bizi izandako esperientziak trukatzeko, eta, finean, elkarrengandik ikasteko eta elkarrekin «Euskal Herria eraikitzen jarraitzeko».
«EH Bilduko alkateek erakutsi dute, garairik zailenetan ere, bestelako gobernantza eredu bat posible ez ezik ezinbestekoa ere badela», Buruagak esan duenez. Nabarmendu du herrietatik Euskal Herri hobe baten aldeko apustua berretsi dutela, eta beste gobernantza eredu bat garatzea posible dela: «Hurbila, entzuten eta aditzen duena, zaintzen duena, herritarrei eta udalerriari berari hazten laguntzen diena, lehen mailako zerbitzu publikoak zaintzen eta sustatzen dituena, eta berdintasun ekonomiko eta soziala bultzatzen duten politika publikoak garatzen dituena».
Era berean, Elorrioko alkateari garrantzitsua iruditzen zaio alkate eta zinegotzien indarrak metatzea, urteetan pilatutako inteligentzia kolektiboa elkartzea eta jakintza horiek zabaltzea. «Guztion indarrak oraindik handiagoa eta aberatsagoa egingo baitu EH Bilduren proiektu politikoa».
