«Irakurlea etsipenaren eta oroiminaren arteko eremu lausora daraman literatur lan ederra. Idazkera neurtua eta neurritsua. Estilo aparta. Hunkigarria da ikustea zer-nolako eragina izan zuen aitaren heriotzak protagonistarengan, eta zein ondo azaltzen dion hori irakurleari. Sakonera handiko erauzte psikologikoa. Protagonistak bere aita definitzen duen moduan definituko du akaso hainbatek nobela hau: gazia eta mingotsa. Zalantzarik gabe, maisulana». Halaxe laburtu dituzte 111 Akademiako kideek euren urteko saria Eider Rodriguezen Eraikuntzarako materiala(Susa) liburuari emateko arrazoiak. Hura izendatu dute iaz argitaratutako libururik gogokoena, eta ekainean jasoko du saria Rodriguezek (Errenteria, Gipuzkoa, 1977), jendaurreko ekitaldi batean.
Iazko azaroan aurkeztu zuen nobela idazleak; genero horretako haren estreinako lana da. Denbora luzez alkoholarekin arazoak izan dituen gizon baten eta haren alabaren arteko harremana du ardatz, eta askotariko materialak harilkatuz dago eraikita kontakizuna. «Uste dut urte asko daramatzadala liburu hau idazten; bestela, ez dut ulertzen nola etorri zitzaidan horrela. Are, baliteke aurrez beste gauza batzuk idatzi izana liburu hau idaztera ausartu ez naizelako», kontatu zion egileak BERRIAri urtarrilean, besteak beste.
Saria zeini eman hautatzeko, hiru bozketa txanda egin dituzte 111 Akademiako kideek —212 dira guztira orain, eta horietako 127k hartu dute parte 2021eko sariduna hautatzeko saioetan—. Azken bueltan, Itxaro Bordaren Euri zitalari esker eleberriaren eta Rodriguezen Eraikuntzarako materiala-ren artean bozkatu dute.
26. aldia du aurten sariak. Azken urteetan, hauek izan dira hura jaso duten idazleak eta lanak: Pello Lizarralderen Argiantza (Erein),Karmele Jaioren Aitaren etxea (Elkar), Harkaitz Canoren Fakirraren ahotsa (Susa), Uxue Alberdiren Jenisjoplin (Susa), Kirmen Uriberen Elkarrekin esnatzeko ordua (Susa), Katixa Agirreren Atertu arte itxaron (Elkar) eta Mikel Peruarenaren Su zelaiak (Susa), besteak beste.
