‘Desapiyua’ egingo dute Antiguako, Añorgako eta Igeldoko herritarrek, euskal presoak etxeratzearen alde

«Eta hi prest al hago?». Galdera zirikatzaile horrekin eta sareetan plazaratutako bideo bitxi bezain jostalari batekin zabaldu dute Desapiyua ta Pesta ekitaldirako gonbidapena Donostiako Antigua, Añorga eta Igeldo auzoetako Sare herri mugimenduko kideek. Bihar izango da, eta, antolatzaileen hitzetan, «aldarrikapenerako» baliatuko dute. Aldarri horiek, baina, ekintza askotarikoen bitartez zabalduko dituzte, eta horietako bat Antigua, Añorga eta Igeldo auzoen arteko desafioa izango da.

Partaideak lehiarako prest daude dagoeneko. Hori nabarmendu dute, behintzat, ekitaldiaren harira sareetan plazaratutako bideoan: «Desapiyorako, Igeldo, prest! Añorga, prest! Antigua, prest!». Tonu jostalarian zabaldu dute antolatutako ekintzetara joateko gonbidapena: artzain andre edo txandala jantzita, desafiorako entrenatzen, elkar animatzen eta gainerako lehiakideak zirikatzen. Arratsaldean izango da, 17:30ean.

Pesta, baina, goizean hasiko da, 12:00etan. Gero, 13:30ean, manifestazio bat egingo dute Etxera bidea gertu lelopean, Añorgako plazatik abiatuta. Ondoren, herri bazkaria egingo dute 14:30ean, eta arratsaldean desafioaren txanda izango da. Hori amaitzean, jaiak eta aldarriek ez dute etenik izango. Eguna amaitzeko, kontzertuak ere izango dituzte, 21:00etan hasita. Indabe, Pelax eta Rukula taldeek joko dute.