Txaloak, malkoak, besarkadak. Amaitu da 22. Korrika, eta amestutakoa bezalakoa izan da amaiera: milaka lagun bildu dira Donostiako bulebarrean, eta ozen entzun da haien aldarrikapena: «Hemen gaude euskararen alde». AEK-ko ordezkariek txalo artean egin dituzte azken metroak, misterioa argitu aurretik: Karmele Jaiok idatzia zen lekukoak barruan zeraman mezua, eta idazleak irakurri du oholtza gainean.
#KORRIKA|ren azken kilometroa ikusi nahi? @AEK_eus bidean irekitzen eta urratzen, Karmele Jaio mezua irakurtzen ta Aize Otañoren hitzak.
— Oli A.A (@olatzartola) April 10, 2022
Ikusi bideoa!#BERRIAkorrika@berria#HitzEkinpic.twitter.com/Xt0OL1q2Hn
Besteak beste, euskara gorpuztu egin behar dela esan du, eta bizia eman behar zaiola. Erreferentziek ere garrantzia izan dute: Pello Zabala, Joan Mari Torrealdai, Elbira Zipitria, Julene Azpeitia, Izaskun Arrue eta Maurizia aipatu ditu Jaiok mezuan. «Ekin euskarari, eutsi kateari! Gora Korrika, eta gora euskara!», aldarrikatuz amaitu du.
Goizean goizetik bildu da jendetza Donostian, eta auzoz auzo joan da lekukoa. Irudi ikusgarriak ikusi dira; adibidez, Egiatik pasatu denean. Eragile nagusien txanda amaieran izan da, Donostiako erdigunean: Gure Esku, Eusko Ikaskuntza, alderdi politikoak, gehiengo sindikala, Hekimen, Euskalgintzaren Kontseilua...
Festak jarraituko du
Mezuaren irakurketaren ez da dena amaitu, ordea. Jai egitarau zabala antolatu dute egun osorako hirian. Zortzi gune zabalduko dituzte: Bulebarrean, Alderdi Ederren, kaian, Zuloaga plazan, Plaza Berrian, Trinitate plazan, Gipuzkoa plazan eta Sarriegi plazan. AEK-k, halaber, ohartarazi du gune horietan ez duela inolako «jazarpenik» onartuko: «Ez matxistak, ez sexistak, ez homofoboak, ez arrazistak...; ezta inor edonola gutxiesterik ere».
Herri bazkaria ere egongo da, Trinitate plazan. Bi txandatan bazkalduko dute, 13:30ean eta 15:00etan. Aurrez, baina, txartela erosi beharko da.
Iluntzean, kontzertuak izango dira zenbait gunetan. Besteak beste, Lamiak, En Tol Sarmiento eta Olatz Salvador musikariak ariko dira zuzenean. Lehentxeago, 16:30ean, bertso saioa izango da kaian, Beñat Gaztelumendi, Oihane Perea, Onintza Enbeita, Sustrai Colina eta Julio Soto bertsolariekin.
Ikusi gehiago:Horrela jarraitu du BERRIAk
