Nafarroako Administrazio Auzitegiak Atarrabiako (Nafarroa) udal pilotalekuko Euskal Herriko armarria ezabatzeko agindu dio Udalari, UPNk ohar baten bidez jakinarazi duenez. Hain zuzen, UPNk aurkeztu zuen pilotalekuan armarria jartzearen aurkako helegitea, botere publikoen neutraltasun politikorako eta interes orokorrak «objektibotasunez zerbitzatzeko betebeharra» urratzen zuela iritzita. Gaur egun EH Bildu da agintean Atarrabiako Udalean.
Udalaren arabera, berriz, Euskal Herriko armarriak identitate kultural eta linguistiko bati egiten dio erreferentzia, eta ez errealitate juridiko edo politiko bati. Halere, UPNk jakinarazi duenez, auzitegiak uko egin dio Atarrabiako Udalaren argudioari. Ez du baliozkotzat jo, eta, beraz, ezabatu dezatela agindu dute epaileek.
